Nunatsinni Ilisimatusarnermik Siunnersuisoqatigiit Savalimmiunilu ilisimatusarnermik siunnersuisoqatigiit – Granskingarráðið – suleqatigiinnissamik isumaqatigiissummik atsiorput.

Saqqummerpoq juunip 29-ani 2023

Isumaqatigiissummut (MoU) siunertaavoq Kalaallit Nunaanni Savalimmiunilu ilisimatusarner-mik nutaaliornermillu suliaqarfiit suleqatigiilluarnerulernissaat.

Kalaallit Nunaat Savalimmiullu soqutigisaqaqatigiipput inuiaqatigiittullu inukitsutut avinngarusimasumiittutut ajornartorsiutigisartagaat imminnut assingullutik. Suliaqarfinni assigiinngitsuni ilisimatusartut amerlanngillat, ilisimatusartullu tamarmik immikkut amerlasuutigut siulliullutik iliuuseqartuusariaqartarput.

Nunat marluk taakku soqutigisaqaqatigiipput, ilaatigut immamut, silap pissusianut, avatangiisinut, peqqissutsimut, kulturimut, takornariaqarnermut, ilisimatusarnermi attaveqatigiinnermut issittumullu atassuteqartunut allanut tunngatillugu.

Ukiuni kingullerni Kalaallit Nunaata Savalimmiullu, ilaatigut Nunat Avannarliit Killiit Siunnersuisoqatigiivi aqqutigalugit, suleqatigiinneruleriartorsimapput.
Forum for Arktisk Forskningimut – FAF-imut – aamma suliniummullu Havforskning i Nordatlantenimut – MARiNAO-imut – peqataaqatigiinnikkut ilisimatusarfiusut marluk taakku ukiut kingulliit ingerlanerini nutaanik attaveqatigiissutissarsisimallutillu suleqatigiissutissarsisimapput.

Aamma nunat marluk taakku nunat tamalaat akornanni suliniutigineqartunut peqataasimapput, ilaatigut Ocean Decade-imut immap nunanut taakkununnga marlunnut pingaaruteqassusianik qitiutitsiffiusumik suliniuteqaqatigiiffiusinnaasumut.

Suleqatigiinnissamik isumaqatigiissuteqarnikkut nunat marluk taakku ilisimatusarnermi nutaaliornermilu suliaqarnerminni sunneqatigiiffigisinnaasaat suussusersiniarneqarput, aamma sulianut suliniutinullu ilisimatusarnikkut suleqatigiinnissamik siuarsaaffiusunut, ilaatigut nuttarnermut programminut, workshoppertitsinernut isumasioqatigiissitsinernullu, peqatigiillutik aningaasaliinissaannut periarfissanik pilersitsniartoqarpoq.

Aamma tamatuminnga isumaqatigiissusiornikkut ilisimatusarneq nutaaliornerlu pillugit kisitsisinik katersuinermik atuisarnermilu pitsanngorsaanissaq aamma Europami nunanilu avannarlerni suliniutit ilisimatusarnikkut aaqqissuussaanikkullu suleqatigiissutigineqarnissaannik siuarsaanissaq anguniarneqarpoq.