Ilisimatusarnermut tapiissutit
Nunatsinni Ilisimatusarnermik Siunnersuisoqatigiit, Kalaallit Nunaanni ilisimatusarfinni suliniutit pingaarnerit arlaannut arlariinnulluunniit attuumassuteqartunut, Namminersorlutik Oqartussat sinnerlugit ukiumut 1,2 mio. koruuninik tapiisarput.
Taakku saniatigut kalaallit danskillu ilisimatusarnermik oqartussaqarfii suleqatigiillutik ilisimatusarnernut qaffasinnerusunut ukiumut 3-5-inut tapiisarput (ph.d. aamma postdoc). Aningaasaliissutit tamarmik tamanut ammasumik qinnuteqarfigineqarsinnaapput, ilisimatusarfinnullu aalajangersimasumik aningaasaliissutaasartut saniatigut tapiissutaasarlutik. Nunatsinni Ilisimatusarnermik Siunnersuisoqatigiit suliniutit ilisimasanik piginnaasanillu Kalaallit Nunaanni inerisaanermik kinguneqarnissaat, aamma suliniutip inuiaqatigiinnut ilisimatitsissutigineqarnissaa assut pingaartippaat.
Ilisimatusarnermik siuarsaanermut aningaasaliissutit
Isumassarsiat piviusunngortinniarlugu taperneqarnissamik qinnuteqarit aamma malittarisassat atuakkit saqqummiussallu kingulliit ataani takullugit.
Suliniummut ataatsimut 250.000 koruunit angullugit qinnuteqaatigineqarsinnaapput.
Ukiumoortumik qinnuteqaqqusineq 2024
Kingusinnerpaamik: 1. marts
Qinnuteqaammik suliarinninneq
Qinnuteqaatinik nassiussinissamut killigititat tassaapput 1. marsi.
Qinnuteqarnissamut killigititamiit sap.ak. arfineq-pingasuni suliarinnittoqarnissaa naatsorsuutigineqassaaq. Qinnuteqartut tamarmik suliarinninnerup inerneranik allakkatigut nalunaarfigineqassapput.
Qinnuteqartoq qinnuteqarfissap killigititaasup sioqqullugu paasiguniuk amigartumik qinnuteqaammik nassiussisimalluni qinnuteqaat tamakkiisoq nassiuteqqinneqassaaq. Qinnuteqartup Nunatsinni Ilisimatusarnermik Siunnersuisoqatigiit Allatseqarfiat qinnuteqaammik nutaamik nassiussinermini nassiussimasaminut amigartumut taarsiullugu nassiullugu nalunaarutigisariaqarpaa.
Qinnuteqarnissamut killigititaq qaangerneqarsimappat qinnuteqartup qinnuteqaat amigartup nassiussimasaa tunngavigalugu nalilersorneqassaaq.
Qinnuteqartup nassiussimasaa aatsaat nalilersorneqarsinnaavoq:
- immersugassaq nittartakkami www.nis.gl-imiittoq immersorsimagaanni
- qinnuteqarnermi immersugassamiittut tamaasa iluamik immersorsimagaanni
- qinnuteqarnermi killigititaasoq qaangersimanngikkaanni
- quppernerit amerlassusissatut nalunaarutigineqarnikut qaangersimanngikkanni
- siornatigut aningaasanik Ilisimatusarnermik Siuarsaanermik aningaasaliissutinik tapiiffigitissimalluni Nunatsinni Ilisimatusarnermik Siunnersuisoqatigiit Allatseqarfianut nalunaarusiorsimagaanni (imaappoq, siornatigut nalunaarusiorsimagaanni krydsiliiffissakkut tamanna nalunaarutigineqassaaq; immersukkami nalunaarusiaq takuneqarsinnaassalluni).
Aningaasaliiffigitittup akisussaaffii:
- Aningaasaliiffigitittup akisussaaffigaa aningaasat siunertamut atorneqarnissai.
- Aningaasaliiffigitittup pisussaaffigaa ilisimatusaatitut suliniutimi inernera tamanut saqqummiunnissaa.
- Suliniutit NIS’imit aningaasaliiffigineqarnikut Isaaffik – the Arctic Gateway nittartakkami isaaffik.org –miittoq atussavaat
- Aningaasaliiffigitittup suliniutigisimasami inernerata tamanut saqqummiunninerani NIS’imit aningaasatigut tapiiffigineqarsimanini paasissutissiissutigissavaa.
Nalunaarusiaq suliniutigisimasap naammassereernerata kingorna kingusinnerpaamik qaammatit sisamat qaangiutsinnagit Nunatta inuinut paasissutissiissutigisinnaasamik imaqartoq naatsorsuutitalik paasinarluartunik assiliartalersugaq annerpaamillu 400’nik oqaasertalik Nunatsinni Ilisimatusarnermik Siunnersuisoqatigiit Allatseqarfianut tunniunneqassaaq.
Ilisimatusarluni suliniutip inerneri tamarmik inaarutaasumik nalunaarusiornikkut nittartagaq qinnuteqartup iserfissaa atorlugu nassiunneqarlutik uppernarsarneqassapput.
Ph.d. aamma postdoc-imut aningaasaliissutit
Kalaallit Nunaata Naalakkersuisoqarfia danskit naalagaaffiat peqatigalugu aningaasaliissutinik tunniussisarput. Aningaasaliissutit siunertaraat kalaallit qallunaallu ilisimatusarnikkut suleqatigiinnerisa nukittorsarnissaa, ilisimatusarnerup siuarsanissaanut, inuusuttullu ilisimatusartut Kalaallit Nunaanni ilisimatusarnermut ataatsimut katersorniarlugit. Ilisimatusarnermik siuarsaanermut sammisani tamatigoortuni tamani qinnuteqartoqarsinnaavoq.
Qinnuteqaatit Nunatsinni ilisimatusarnermut siunnersoqatigiivisa isumagisarpaat, aningaasaliissutaasulli aaqqissuunneqarnerni Pinngortitaleriffimmik isumagineqartarlutik. Ukiumoortumik qinnuteqarnissaq Pinngortitaleriffimmiit paasititsiniutigineqartarpoq.
Qinnuteqarnermut immersugassat piumasaqaataasullu pinngortitaleriffiup nittartagaani nassaarineqarsinnaapput: natur.gl
