Understanding the Ecological Role of Biting Flies in Greenland
Ph.d.-nngorniaq: Viktor Gårdman
Suliniut Pinngortitaleriffimmi, Avatangiisinut Aatsitassanullu immikkoortortaqarfimmi; aamma Swedish University of Agricultural Sciences, Department of Ecologymi ingerlanneqassaaq.
Suliniummi Kalaallit Nunaanni sullerngit kiisisartut misissornissaat siunertaavoq. Sullerngit taakku inunnut uumasunullu akorngutaasarput, kiitinneq sapaatip akunneri sinnerlugit ungilannarsinnaasarmat akorngutaasarlunilu. Aasat tamarluinnaasa Kalaallit Nunaanni inuit uumasullu sullerngit tuusintilippassuit kiisisartut paaminnarisarpaat, taakkuli ilisimasaqarfigineqarpallaanngillat. Suliuniutip siunertaraa sullerngit kiisisartut pillugit ilisimasaqarnerulernissaq.
Siullermik Kalaallit Nunaanni sullerngit kiisisartut assigiinngitsut qassiunersut misissorniarpakka. Taamaaliorniarlunga Kalaallit Nunaata kitaata sineriaani najugallit sullinernik kiisisartunik, ippernanut pullatit immikkuullarissut atorlugit katersinermi suleqatigissavakka. Kingorna nakkutigisaasumik misileraaneq ingerlatissavara silap pissusiata qanoq innera ukiumut ippernat tukertartut amerlassusaannut qanoq sunniuteqartarnersoq, sullerngillu kiisisartut nerisassat nukissallu allat pillugit unammisarnersut misissorniarlugit.
Naak sullerngit kiisisartut aammik milluaanerusaraluartut pinngortitami aamma allatut sunniuteqartarput. Taamaammat sullerngit kiisisartut piniakkanut imaluunniit naasut pujoralaannik siaruartiterisartunut inissisimanerat misissussavara, aammalu uumasunut assigiinngitsunut piuinnarnissamut sullerngit kiisisartut arlaatigut pisariaqartinneqarnersut misissussallugit. Taamaammat sullinerngit kiisisartut qassiuneri siaruarsimanerilu aallaavigalugit siunissami qanoq isikkoqarsinnaanersut ilisimalikkakka atorlugit naatsorsorneqarsinnaassaaq (assersuutigalugu silaannaap kissatsikkiartornera ilutigalugu ippernat amerlatsikkiartussappat?) aamma uumasunut allanut ippernanik pisariaqartitsisunut qanoq kinguneqarsinnaanersoq (assersuutigalugu timissat imlt. sullerngit allat). Aammattaaq sullerngit kiisisartut Kalaallit Nunaanni nappaatinik tunillaasinnaanersut, nappaatillu taakku uumasunut, uumasuutinut inunnulluunniit ajoqutaasinnaanersut misissussavakka.
Naatsorsuutigaara suliniummi ilisimalikkat Kalaallit Nunaanni inuiaqatigiinnut allanullu soqutigisaqaqatigiinnut (ass. nunaatillit, piniartut aamma takornariat) nalitoorujussuussasut, neriuppungalu suliniut innuttaasunut sullinernut kiisisartunut ilisimasaqartitsinerulissasoq, aammalu sooq sumiiffiit ilaanni kiisisartunik sullineqarnerusarnersoq ilisimasaqartitsinerulissasoq. Neriuutigaara aamma suliniummi sullinernut kiisisartunut siulittuutit siunissami inuiaqatigiinnut kalaallinut iluaqutaallutillu uumasunut assigiinngitsunut uumassusillit ataqatigiiaarnerannut allannguutaasinnaasunut piareersaataasinnaassasoq.
Aningaasaliissutit: DKK 2.570.400
