Qilakitsormiut – Kalaallit Nunaanni oqaluttuarisaanermi inuit tiguaatinik misissuineq isiginninnerlu qilakitsup inui muminngortinneqarsimasut misissuinerisigut siammarterinerisigullu misissuiffigineqarpoq
Ph.d.-nngorniaq Sara Næss Elleskov, Kulturimik, Oqqtsinik Oqaluttuarisaanermillu Ilisimatusarfik
Aningaasaliissutaasut: DKK 2.225.103
Projektip nassuiaataa:
Suliniummi uani kalaallit isaannik oqaluttuarisaanermi nunatsinni inuusimasut sinnerisa ilisimatusarfigineqarnerat timillu Uummannap eqqaani Qilakitsormiut paniinnarnikut arfineq pingasuusut saqqummiunneqartarnerat itisilerneqassaaq. Inuit taakku Inuit suli nunasiaataanngikkallarmata inuunermut, toqumut kulturikkullu ileqquusimasut pillugit paasisaqartippaatigut. Taassuminngali ilisimatusarneq ullumikkut Inunnut qanoq sunniuteqarpa? Nunatsinni inuit ullumikkut siuaasat taakku, ilisimatusarnikkut ilikkagaqarluarfiusimasut, qanoq isiginiarneqarpat? Oqaluttuarisaaneq qiviassagutsigu ilisimatusartut nunani killerneersut inuit taakku sinneri ilisimatusarfigineqarneri aquppaat – kalaallilli namminneerlutik siuaasamik misissorneqarsimanerat qanoq isigaat?
Tamanna misissorluarniarlugu pitsaassuseq aallaavigalugu misissueriaaseq atorniarpara inuillu paniinnarsimasut Qilakitsumeersut pillugit ilisimatusarsimaneq saqqummiunneqarsimanerat oqallisiginiarpara, kiisalu kalaallit ilisimariigaat aallaaviginiarlugit nunaqavissut peqataatillugit. Ilisimatusarnermi paasisat apersuinikkut katersorneqassapput, taakkulu siunertarissavaat apersorneqartut nunarsuarmi isiginnittariaasaat assigiinngisitaartut pissarsiarinissaat. Nunaqavissut peqataatinneqarnerannut peqqutaasoq taamaammat tassaavoq Qilakitsormiunut toqqaannartumik attuumassutilinnit tusagaqarnissaq. Tamanna pissaaq nunaqarfiusimasup eqqaanik, Uummannamut apersuiartornissaq, Uummannamilu katersugaasivimmi illoqarfimmilu suliffeqarfinni allani aaqqissuussaqariartorluni arlaleriarluni tikittarnissaq.
Nunasiaataasimanerup isornartorsiorneqarsimaneranik isumassarsiorfigalugu nunasiaataasimaneq isoralugu suleriuseqarneq atorneqassaaq, tassanilu Inuit oqaluttuarisaaneranni kulturiannilu nunatsinni inuusimasut uumassusilinnik aammalu inuit inuiaqatigiillu pissusaanik itsarnisarsiornikkullu ilisimatusaataasimasut misissorneqassapput. Suliniummi uani nunaqavissut nipaat ersarissarneqassapput, sumiiffimmilu iliuuseqartoqarsinnaanera qulakkeerneqassalluni. Tamanna ilaatigut aallartisarneqassaaq ilisimatusarnikkut naapertuilluarnissamik peqataatitsisumillu ilisimatusartoqarnissaq pilersinniarlugu ataavartumik isummerfigeriigaasimasunik suliaqarsimanermilu najugaqartut pissaaneqarsimanermik eqqarsaatersortitsinikkut.
Ilisimatusarsimanerit maannalu ilisimatusarnerit peqqissaartumik paasititsinissaannik pilersitsiniarlunga suliniummi allagaatitoqqanik, soorlu nalunaarutinik, naqitanik, medianik saqqummersitanillu misissuissaanga. Taakku saniatigut Nunatta Katersugaasiviani nunatsinni ilisimatusartartunut, inuit paniinnarnikut pillugit ileqqunillu ilisimasallit workshopertitsinissamik aaqqissuissaanga, oqallinnerit pilersinniarlugit nunatsinnilu ilisimatusarnerup silarsuaani inuit paniinnarnikut oqaluttuarisaanermi isigineqarneri paasiniarlugit. Ilisimatusarsimanerup tassanilu inernerusimasut ataqatigiinneri kiisalu ullumikkut Inuit isigeriaasaasa misissorneranni suliniummi Kalaallit Nunaanni kulturikkut oqaluttuarisaanermilu sunniutaannik paasinnittariaaseq taakkunanilu pissaaneqassuseq ersarissarniarpakka. Suliniummili anguniagaq pingaarnerpaaq tassaavoq Kalaallit Nunaanni ilisimatusarnermi ilisisimatusartut inissisimanerat pillugu, ullumikkut kalaallit nunarsuarmut isiginnittariaasaat kulturiallu, oqaluttuarisaanikkut sorlaqarluartoq tunngavigalugu, oqallittoqalernissaa.
