Nunatsinni ilisimatusarnermi periarfissat pisinnaasallu
Ph.d.-nngorniaq: Paninnguaq Boassen, Kulturimik, Oqaatsinik, Oqaluttuarisaanermillu Ilisimatusarfik
Aningaasaliissutit: DKK 2.225.103
Projektip nassuiaataa:
Naalakkersuisut aamma atorfeqarfiit ilisimatusarnermut anguniagassat ilisimalluinnarlugit, ‘ilisimatusarnermi inuiaqatigiinni’ peqataaneq ilanngussinerlu qanoq ililluni ilisimatusarnermut aamma innuttaasut tamakkerlugit isumannaatsuunissaannut iluaqutaasinnaaneralu erseqqissarniarpara. Soqutigisaqaqatigiit ullumikkut Nunatsinni ilisimatusarnerup ingerlanneqarnera malittarisassiorneqarneralu oqaluuserivaat. Ph.d.-milu suliaq una ilisimatusarnermi periaatsit pingaaruteqarnerat aamma sooq siunertaqarneq, peqataaneq, suleqatigiinnerlu Nunatsinni qajannaatsuunerup isumannaatsuunerullu nukittorsarnissaanut pisariaqartinneqarnersut tunngavilersuutigineqassaaq.
Ph.d.-mik ilisimatusarninni apeqqutigissavara: ilisimatusartut Nunatsinni innuttaasut akiuussinnaassuseqarnerannut atugarissaarnerannullu qanoq sunniuteqartarpat, aamma periarfissat pisinnaasallu suuppat? Apeqqutit matuma ilaatut annertunerusumik misissussavakka: 1) Soqutigisaqaqatigiit misissuinermi pinertussusineq peqqissussanerlu qanoq paasisaqarfigivaat? 2) Ilisimatuut sulinerannut avatangiisit qanoq sunniuteqartarpat? 3) Ilisimatuut sulinerat Kalaallit pinertussusiannut aamma peqqissusaannut iluaqutaasartoq periarfissanik aammalu pisinnaassuseqarfiusunik inissat sumiippat?
Apeqquteqaatinnut akissuteqarniarlunga misissuinermi suliaaseq Grounded Theory (GT) atussavara. Periaatsit arlallit atortissinnaagamiuk paasissutissanik katersiguma, aamma paasissutissanik tunngaveqartumik eqqarsaataannarsorneq (teori) inernerilersinnaagamiuk. Misissuinermi soqutigisaqaqatigiit apersorneqarnerisigut aamma malinnaafigalugit paasissutissanik katersiumaarpunga. GT atorlugu soqutigisaqaqatigiit isumaat atuakkiallu nassaarisimasakka malillugit, ilisimatusarnermi periarfissat pisinnaassuseqafiusunillu piffiit pillugit eqqarsaataannasorneq
suliarissavara. Ilisimatusarnermi soqutigisaqaqatigiit tassaapput: ilisimatuut, paasissutissiisut, aqutsisoqarfiit, ilisimatusarfiillu. Taakku tassaapput Nunatsnni ‘ilisimatusarnemik inuiaqatigiinnik’ malittarisassiornermi ingerlatsinermilu peqataasut.
Matuma ph.d.-mi siunertaavoq ilisimatusarnerup sunniuteqarnera atuuffialu pillugu Nunatsinni ullumikkut oqallinneq ilannguffigalugu. Damage Narratives ineriartortinneqartarput inuiaqatigiit akuersaarunik ‘ajornartorsiutitik’ pillugit misissuinerit suliarineqarunik, qularnaveeqqusiineqaramik taanna misissuineq kinguneqarumaarmat atortuinik politikkikkulluuniit iluaqutaasumik ineriartorneq. Misissuinerma periuusia ajoqusernermik (Damage Narratives) qitiutitsisoqannginnissaanut, toqqarpara siunissamut qiviarnissaq utopia-mik eqqarsaatersornissaq qulakkeerniarlugu pisinnaassuseqarfiusumik innersuussuteqartoqarsinnaasoq aamma periarfissaqartoq piviusunngortinneqarsinnaasumik, siornatigut ullumikkullu piviusuusimasoq allaavanik. Inuiaqatigiit ajortutut ajugaaffigineqarsimasutullu oqaluttuat akerliuniarlugit piumassutsimik tunngaveqartumik inuiaqatigiinni pissanganartut piviusut oqaluttuarneqassapput. Ilisimasaqarluarneq
neriuuteqarnerlu qitiutillugit allanngortitsinerit takorloorneqarsinnaapput, ilisimasat inuiaqatigiinnut siunertaqanissaat periarfissippaat, ilisimatuut inuiaqatigiinni suleqatigiinnermik ingerlatsinerminni imminnut pitsaasunik pilersitsisarlunilu.
