Aningaasalerneqartut ukununnga tunngapput:

• Ph.d.-nngorniaq Bodil Hoffmeyer, nuna tamakkerlugu nalunaarsuinikkut naartusut sukkortut naartunermilu ilakutaqaleratarsinnaanermik misissuiniartoq. Suliniut Inuunerissaaneq Stenomi; Ilisimatusarfik, Peqqissaanermik Pinngortitamillu Ilisimatusarfik; aamma Københavns Universitetimi ingerlanneqassaaq. Tamanna pillugu uani atuarit
• Ph.d.-nngorniaq Paninnguaq Boassen, Nunatsinni ilisimatusarnermi sinaakkutit taakkulu isumaat samminiarpai. Aningaasaliineq Ilisimatusarfimmi, Kulturimik, Oqaatsinik Oqaluttuarisaanermillu Ilisimatusarfimmi ingerlanneqartussatut tunniunneqarput. Apersorneqarnera uani atuaruk 
• Ph.d.-nngorniaq Sara Elleskov, Qilakitsormiut biologiskimik, antropologiskimik itsarnisarsiornikkullu ilisimatusarnikkut qanoq Inuit oqaluttuaataannik kulturianillu ilisimatusarfigineqarsimanersut misissussavai. Aningaasaliineq Ilisimatusarfimmi, Kulturimik, Oqaatsinik Oqaluttuarisaanermillu Ilisimatusarfimmi ingerlanneqartussatut tunniunneqarput. Tamanna pillugu uani atuarit
• Postdoc Sascha Schiøtt Pinngortitaleriffik, Ilulissani Kangiani uumassusillit ataqatigiiaarneranni planktonit inissisimanerat ilisimatusarfiginiarpai. Apersorneqarnera uani atuarit.

Ilisimatusarnikkut suliniutit toqqarneqarsimasut tamarmik ilisimatuussutsikkut qaffasissumik pitsaassutsimillu Kalaallit Nunaannut inuiaqatigiinnut attuumassuteqarluarnermik ilisarnaatitaqarput.

– Ukioq manna tapiinerit ilisimatusartunut ataasiakkaanut iluaqutaaginnarnatik Kalaallit Nunaanut ataatsimut isigalugu aamma iluaqutaassapput, suliniutit piffissami allanngoriartupiloorfigisumi ilisimasanut nutaanut naleqartitsilergiusussami aqqutissiusussaallutik, Nunatsinni Ilisimatusarnermik Siunnersuisoqatigiinni siulittaasuugallartoq, Lorenz Meirep oqaatigaa.

Nunatsinni Ilisimatusarnermik Siunnersuisoqatigiit ph.d-nngornianut postdoc-inullu qinnuteqarnissamut killigitinneqartumi 1. oktober 2024-mi qinnuteqaatinik katillugit 17-inik tigusaqarsimapput. Qinnuteqaatit nassiunneqartut katillugit 38 mio. kr. sinnilaarlugit aningaasartaqarput.

Arnat qinnuteqartut 13-iupput, angutillu sisamaallutik.

Suliniutit taperneqartut tamaasa pillugit uani paasisaqarnerugit.