Mitdlarak Lennert Nunatsinni Ilisimatusarnermik Siunnersuisoqatigiinni siulittaasussatut Naalakkersuisunit toqqarneqarpoq. Siunnersuisoqatigiit nunatsinni ilisimatusarnerup ineriartortinneqarnerani siulittaasunngortoq siuttuussaaq.

Naalakkersuisut Nunatsinni Ilisimatusarnermik Siunnersuisoqatigiinni ukuni pingasuni ilaasortaasussat toqqarpaat. Mitdlarak Lennert siulittaasussatut toqqagaavoq.

Siunnersuisoqatigiinni ilaasortaalersut tassaapput:

• Mitdlarak Lennert (siulittaasoq), siunnersorti namminersortoq Ilisimatusarfimmilu avataaneersutut ilinniartitsisoq
• Gert Mulvad, Inuunersissaavimmit, Nunatsinni Peqqinnissaqarfiup ataani nunap immikkoortuani (toqqagaaqqippoq)
• Inoqut Kristensen, Nalik Ventures-imi ivestment manageri analystilu
• Kirsty Langley, Asiaq – Greenland Survey-mi ilisimatooq
• Lorenz Meire, Pinngortitaleriffiup Silap Pissusianik Ilisimatusarfiani ilisimatooq
• Louise Sandberg Sørensen, DTU Space-mi ilisimatooq, Arctic DTU – Ilinniarfeqarfik Sisimiunit innersuunneqartoq
• Rasmus Leander Nielsen, Nasiffimmi – Nunanut Allanut Sillimaniarnermullu Ilisimatusarfimmi lektori aqutsisorlu
• Vivi Noahsen, Nunatta Katersugaasivia Allagaateqarfimmi aqutsisoq

Naalagaaffinngornissamut Nunanullu allanut Naalakkersuisoq Vivian Motzfeldt oqarpoq:

– Ilisimatusarnermut siunnersuisarneq ilisimatusarnermullu aningaasaliisarneq pillugit inatsisip nunatsinnit inuiaqatigiinnillu iluaqutissanngortinnissaa ineriartortinneqarnissaalu eqqarsaatigalugit Nunatsinni Ilisimatusarnermut Siunnersuisoqatigiit 2014-imiilli pingaarutilimmik inissisimanikuupput. Siunnersuisoqatigiinnit tunuartut suleqataasimanerinik qujaffigiutigalugit siunnersuisoqatigiinni ilaasortanngortut nutaat tikilluaqquakka. Ilisimatusarnermik Siunnersuisoqatigiit Naalakkersuisut Naalakkersuisoqarfiillu ilisimatusarnikkut siunnersussallugit suliassaraat. Ilaasortanngortut nutaat suleqatigissallugit qilanaaraara tamatuma saniatigut ilinniarfiit suliffeqarfiillu inassuteqarsimanerinut qujaffigaakka”.

• • Naalakkersuisuisoqarfimmiinngaanniit nalunaarut uani atuarsinnaavat

Mitdlarak Lennert namminersortuulluni siunnersortiuvoq inuiaqatigiinnillu ilisimatusarsimasuuvoq nunatsinni meeqqat atuarfiat aaqqissuussaanermilu nakkutilleeriaatsit nalilersueriaatsillu ingerlanneqarneri sammisimallugit. Mitdlarak Lennertip Josephine Nymand, Nunatsinni Ilisimatusarnermik Siunnersuisoqatigiinni ukiuni 2017-2023 siulittaasimasoq taarserpaa.

Mitdlarak Lennertip toqqarneqarnerminut tunngatillugu oqaatigaa:

– Ukioq ataaseq sinnilaarlugu qaangiuppoq Kalaallit Nunaanni ilisimatusarnermi periusissiaq siulleq akuerineqarmat. Naalakkersuisut ilisimatusarnermi periusissiami ilisimatusarnerup silarsuaani politikkikkut takorluukkat siunertallu inissippaat, siunertallu tassaapput siunnersuisoqatigiit piviusunngortitseqataaffigisassaat. Siulittaasutit ilisimatusarnermi ilisimatusarnermilu siunnersuisoqatigiinni sinaakkutit pitsaanerulernissaannut sulinissara qilanaaraara.

Nunatsinni Ilisimatusarnermik Siunnersuisoqatigiit ilisimatusarnermut aningaasaliisartuupput, aalajangiisartunut ilisimatusarnermullu attuumassutilinnut aamma ilisimatusarnermi politikkunut tunngasunut siunnersuisartuullutik. Siunnersuisoqatigiit aamma nunat tamalaat akornanni ilisimatusarnikkut suleqatigiinnernut peqataasarnissamut siuarsaasuullutillu ilisimalikkanik saqqummiinermik nukittorsaasuupput. Siunnersuisoqatigiit 2023-mi Ilisimatusarnermut siunnersuisarneq ilisimatusarnermullu aningaasaliisarneq pillugit Inatsisartut inatsisaat nr. 5 20. novembari 2013-imili atuutilerneranit ukiuni qulinngortorsiorput.