Nunatsinni Ilisimatusarnermik Siunnersuisoqatigiit Nordforskimi ‘Sustainable Development of the Arctic’-imik taaguuteqartumut allagarsiussamut suleqataapput. Suliniummi alloriarneq siulleq kingusinnerpaamik 4. juni 2024 tunniussiffissatut ullulerneqartoq nalunaarutigineqarpoq (call for pre-proposals).
Saqqummerpoq 13. marts 2024
Nunatsinni Ilisimatusarnermik Siunnersuisoqatigiit Nordforskimi allagarsiussami taaguutilimmi: Sustainable Development of the Arctic-mut aningaasaleeqataapput. Kalaallit Nunaata Savalimmiullu aningaasaleeqataaffigisaanni Nordforskimiit allagarsiussaq siulliuvoq. Aamma NordForskimi allagarsiussinermi siullerpaamik nunat avannarliit Canadamit USA-miillu ilisimatusarnermut aningaasaateqarfinnik suleqatigiinneruvoq. Qinnuteqarfissamut siullermut paasissutissat, allagarsiussaq tamakkerlugu qinnuteqarnermilu najoqqutassat Nordforskip nittartagaani nassaarineqarsinnaapput.
Allagarsiussamut paasissutissat:
Allagarsiinerup pingaarnertut siunertaraa issittumi nunat pineqartut akornanni ilisimatusarnikkut suleqatigiinnerup tapersersornissaat, Issittumi piujuartitsisumik ineriartortitsinermut ilisimalikkanik paasissutissiinissaq eqqarsaatigalugu. Allagarsiussami nunani avannarlerniittunut naatsorsuutit 190 millioner NOK-t tungaanut naleqarput, taakkualu saniatigut Canadamit amerikamiunillu suleqatigiinnut immikkut aningaasaliissuteqartoqassalluni.
Nunatsinni Ilisimatusarnermik Siunnersuisoqatigiit aningaasaliissutinut 2,5 mio. DKK-nik tapiipput. Nunat avannarlerni suleqatigiit ataatsimoorlutik suliniummut ataatsimut, minnerpaamik nunanit assigiinngitsunit pingasuneersunit inuttalimmeersut, 18-24 millioner NOK-nik qinnuteqarsinnaapput. Aaqqissuussaq ataatsimut aningaasaliisussatut aaqqissugaavoq, tassungalu nunat avannarlerneersunut suminngaanneerneq apeqqutaanani assigiimmik allagarsiussami naatsorsugaasunut qinnuteqarsinnaanermut periarfissiivoq.
Allagarsiussaq sammisanut alajangersimasunut pituttuisuunngilaq, qinnuteqarniartunulli ilisimatusarfissaminnut ineriartortitsiniarlutik isumassarsiornerminni oqaatsit pingasut isumassarsiorfigisinnaasaat tassaapput: Security, Natural Resources, and/or Societal Changes. Aammattaaq piujuartsineq, Issittumut naleqartitsinerulernissaq, nunallu inoqqaavinit isiginnittaaseqarnissaq qinnuteqartunit eqqarsaatigineqassasut naatsorsuutigineqarpoq.
Allagarsiussap ineriartortinneqarnera saqqummiunneqarneralu ilisimatusarnermut aningaasaliisarfinnit: Norge, Finland, Danmark, Sverige, Savalimmiut, Kalaallit Nunaat, Island, Canada aamma USA aammalu NordForsk-ip akornanni suleqatigiissutaavoq.
Webinar
Nordforsk allagarsiussaq pillugu 19. marts Kalaallit Nunaata nalunaaqutaa malillugu nal. 12.00-13.00 webinarertitsissaaq.
NordForskip nittartagaatigut webinari pillugu paasisaqarnerugit.
Attavissat:
Allagarsiussaq pillugu apeqqutissanut saaffiginniffissaq:
Siunnersuisoq Kristin Andersen, NordForsk, tel. +4790581647, e-mail: Kristin.andersen@nordforsk.org
