Qinnuteqartunut
paasissutissaq pingaaruteqartoq
Qinnuteqarnissamut
portalimi teknikkikkut ajornartorsiuteqaruit, qinnuteqaat e-mailikkut
utaqqiisaasumik nassiunneqarsinnaavoq.
Qinnuteqaatit
uunga nassiunneqassapput: njsn@nanoq.gl
Teknikkikkut
ajornartorsiutit piaartumik aaqqinniarlugit sulissutigaarput,
akornutaasinnaasorlu ajuusaarutigaarput.
Ilisimatusarnermut tapiissutit
Ukiumut Kalaallit Nunaanni Ilisimatusarnermut Siunnersuisoqatigiit 1.281.000 kr.-inik ilisimatusarfigisanik suliniutinut agguaasarput, taakkua Kalaallit Nunaanni ingerlatsivinnut attuumassuteqartut aammalu ilisimatusarnermi pingaarutilinnut tamanut, immikkoortunut ataasiakkaanut aammalu immikkoortut akimorlugit ingerlanneqartunut tunngassuteqartut.
Tamatuma saniatigut kalaallit-danskisut ataatsimoorussamik aningaasalersuinikkut ukiumut ph.d.-nngorniartunut aamma postdoc-nngorniartunut 3–5-it tikillugit stipendiat agguaanneqartarput.
Aningaasat tamarmik ammasumik unammilleqatigiinnikkut agguaanneqartarput, aammalu sammisanut killilersorneqarsimanatik. Kalaallit Nunaanni Ilisimatusarnermut Siunnersuisoqatigiit immikkut pingaartippaat ilisimatusarnerup inuiaqatigiinnut attuumassuteqarnera, kiisalu suliniutit Kalaallit Nunaanni ilisimasaqarnermik piginnaasanillu ineriartortitsinermut tapertaasinnaanerat.
Ilisimatusarnermik siuarsaanermut aningaasaliissutit
Qinnuteqarit isumassarsiatit piviusunngortinniarlugit tapersersorneqarnissamut, aammalu ilitsersuutitsinnut nalunaarutinullu atuartunut ataani takuneqarsinnaasunut atuarit.
Programmi una aqqutigalugu ataasiakkaanut suliniutinut 100.000 kr.-it tikillugit qinnuteqarsinnaasoqarsinnaavoq, tassani ataatsimik ilisimatusarfiusumik ingerlatsivimmik peqataasoqartillugu. Taamatuttaaq ataasiakkaanut suliniutinut 250.000 kr.-it tikillugit qinnuteqarsinnaasoqarsinnaavoq, minnerpaamik marluk nunatsinni ingerlatsiviusut suleqatigiillutik suliniummi peqataappata, aammalu aningaasartuutit peqataasut akornanni naapertuuttumik agguarneqarsimappata.
Ukiumoortumik qinnuteqaqqusineq 2025
Kingusinnerpaamik: 1. marts
Qinnuteqaammik suliarinninneq
Qinnuteqaatinik nassiussinissamut killigititat tassaapput 1. marsi.
Qinnuteqarnissamut killigititamiit sap.ak. arfineq-pingasuni suliarinnittoqarnissaa naatsorsuutigineqassaaq. Qinnuteqartut tamarmik suliarinninnerup inerneranik allakkatigut nalunaarfigineqassapput.
Qinnuteqartoq qinnuteqarfissap killigititaasup sioqqullugu paasiguniuk amigartumik qinnuteqaammik nassiussisimalluni qinnuteqaat tamakkiisoq nassiuteqqinneqassaaq. Qinnuteqartup Nunatsinni Ilisimatusarnermik Siunnersuisoqatigiit Allatseqarfiat qinnuteqaammik nutaamik nassiussinermini nassiussimasaminut amigartumut taarsiullugu nassiullugu nalunaarutigisariaqarpaa.
Qinnuteqarnissamut killigititaq qaangerneqarsimappat qinnuteqartup qinnuteqaat amigartup nassiussimasaa tunngavigalugu nalilersorneqassaaq.
Qinnuteqartup nassiussimasaa aatsaat nalilersorneqarsinnaavoq:
- immersugassaq nittartakkami www.nis.gl-imiittoq immersorsimagaanni
- qinnuteqarnermi immersugassamiittut tamaasa iluamik immersorsimagaanni
- qinnuteqarnermi killigititaasoq qaangersimanngikkaanni
- quppernerit amerlassusissatut nalunaarutigineqarnikut qaangersimanngikkanni
- siornatigut aningaasanik Ilisimatusarnermik Siuarsaanermik aningaasaliissutinik tapiiffigitissimalluni Nunatsinni Ilisimatusarnermik Siunnersuisoqatigiit Allatseqarfianut nalunaarusiorsimagaanni (imaappoq, siornatigut nalunaarusiorsimagaanni krydsiliiffissakkut tamanna nalunaarutigineqassaaq; immersukkami nalunaarusiaq takuneqarsinnaassalluni).
Aningaasaliiffigitittup akisussaaffii:
- Aningaasaliiffigitittup akisussaaffigaa aningaasat siunertamut atorneqarnissai.
- Aningaasaliiffigitittup pisussaaffigaa ilisimatusaatitut suliniutimi inernera tamanut saqqummiunnissaa.
- Suliniutit NIS’imit aningaasaliiffigineqarnikut Isaaffik – the Arctic Gateway nittartakkami isaaffik.org –miittoq atussavaat
- Aningaasaliiffigitittup suliniutigisimasami inernerata tamanut saqqummiunninerani NIS’imit aningaasatigut tapiiffigineqarsimanini paasissutissiissutigissavaa.
Nalunaarusiaq suliniutigisimasap naammassereernerata kingorna kingusinnerpaamik qaammatit sisamat qaangiutsinnagit Nunatta inuinut paasissutissiissutigisinnaasamik imaqartoq naatsorsuutitalik paasinarluartunik assiliartalersugaq annerpaamillu 400’nik oqaasertalik Nunatsinni Ilisimatusarnermik Siunnersuisoqatigiit Allatseqarfianut tunniunneqassaaq.
Ilisimatusarluni suliniutip inerneri tamarmik inaarutaasumik nalunaarusiornikkut nittartagaq qinnuteqartup iserfissaa atorlugu nassiunneqarlutik uppernarsarneqassapput.
Ph.d. aamma postdoc-imut aningaasaliissutit
Ukiumut ataasiarlugu Kalaallit Nunaanni Namminersorlutik Oqartussat aamma Danmarkip naalagaaffia ph.d.- aamma postdoc-stipendianik ataatsimoorlutik aningaasaliissuteqartarput, Kalaallit Nunaanni aamma Kalaallit Nunaannut tunngatillugu ilisimatusarnermik pisinnaasatigut nukittorsaanissaq siunertaralugu. Aaqqissuussineq piginnaasanik ineriartortitsinermik tapersersuinissaq, ilisimatuunik tikisitsinissaq attatiinnarneqarnissaallu kiisalu kalaallisut-danskisut ilisimatusarnermi qanittumik sivisuumillu suleqatigiinnerup siuarsarneqarnissaa anguniagarivaa. Stipendiat ilisimatusarnermi pingaarnertut sammisat tamaasa iluini qinnutigineqarsinnaapput.
Kalaallit Nunaanni Ilisimatusarnermik Siunnersuisoqatigiit qinnuteqaatinik suliarinninneq pingaarnertut suliaraat, allaffissornikkullu ingerlatsineq sekretariatimit isumagineqarpoq, taanna aaqqissuussaanikkut Nunanut Allanut Ilisimatusarnermullu Naalakkersuisoqarfimmi inissisimavoq.