Postdoc: Birgit Niclasen, Kalaallit Nunaanni Peqqissutsimik Ilisimatusarfik
Aningaasaliissutit: 96.000 kr.

Projekti pillugu nassuiaat:

Projekti manna pillugu siunertaq tassaavoq periuseq nutaaq – 15-metodi – misileraalluni atorneqarnissaa, taamaalilluni napparsimasut akornanni imigassamik atuinerup annertusinerata katsorsaanermut akornusiisinnaanera imaluunniit napparsimasut aallaaviusumik nappaataasa ajorseriarnerannik kinguneqartarnera paasiniarneqarsinnaalluni. Periutsip anguniarpaa imigassamik ajornartorsiutit ileqqorissaarnermut tunngasutut pinnagit nakorsaanermut atatillugu ajornartorsiutitut isigineqarnissaat.

15-metodi tassaavoq periuseq pisariitsoq, atorneqarsinnaalluartoq aammalu paasiuminartoq imigassamut tunngasunik ajornartorsiutinik suliaqarnermi. Periuseq uppernarsarneqarnikuuvoq (evidensbaseret) aammalu Sverigemi Danmarkimilu iluatsittumik atorneqareersimalluni. Periutsip paasissutissanik kiisalu suliassanik, pisariaqartitsineq naapertorlugu napparsimasup ataasiakkaap ingerlanissaanut naleqqussarneqarsinnaasunik, imaqartuuvoq. Pingaarnerit ukuupput:

– Napparsimasut imigassamik qanoq atuisarnerannut eqqumaffiginninneq, pingaartumik ersiutit imigassamut attuumassuteqarsinnaapput
– Oqaloqatigiinneq tunngavigalugu utertitsilluni siunnersuineq
– Allannguinissamut tapersersuineq, napparsimasoq tamanna kissaatigippagu

15-metodi Naalakkersuisut anguniagaannut naapertuuppoq, tassa imigassamut politikkimut ukiuni arlalinni atuuttussamut, uppernarsarneqartunik tunngavilimmik, misissuilluni nalilersuinermut atortussanik ineriartortitsinissaq pillugu.

Allorfik 2026-mi martsimi periutsimik ilinniartitsissaaq, peqataaneq inunnut tamanut peqqinnissaqarfimmi sulisunut periarfissaassalluni, peqataaneq nammineq ornigulluni imaluunniit online-kkut pisinnaalluni. Ilinniartitsinermut sioqqullugu nakorsat peqqissaasullu peqataarusuttut peqataatinneqassapput, taamaalillutik periuseq nammineq sulinerminni misilissinnaassallugu.

Misileraanerup kingorna qaammatit 2–4 kingorna peqataasut misilittagaat katersorneqassapput, taamaalilluni periutsip atortussai kiisalu Kalaallit Nunaanni peqqinnissaqarfimmi atorneqarsinnaanera nalilersorneqarluni. Misilittakkat taakku tunngavigalugit nalunaarusiaq Peqqissutsimut Aqutsisoqarfimmut aammalu Peqqissutsimut Naalakkersuisoqarfimmut saqqummiunneqassaaq.