Saqqummerpoq 30. august 2024
Savalimmiuni, Islandimi Kalaallillu Nunaanni suleqatigiinnermut soqutiginninneq annertuvoq.
Sapaatip akunnerani kingullermi ilisimatuut 70-t missaanni amerlassusillit ilisimatusarfinniillu allaneersut Nunat Avannarlerni Killernilu ilisimatusarmi siunnersuisoqatigiit Tórshavnimi Nordens Husimi suleqatigiinnermi workshopeqatigiipput.
Workshopernerup taaguutigaa GLISFO 2024 – Nunat ilaasa attaveqarnerisa nukittorsarnerat.Workshopernerup siunertaraa Kalaallit Nunaata, Islandip Savalimmiullu ilisimatusarnikkut suleqatigiinnerisa nukissorsarnissaat. Nunat taakku pingasuusut assigiissutigaat annertuumik imartaqarlutillu assigiipajaartunik suliaqartuupput.
Pilersaarusiap imarai saqqummiinerit, oqallinnerit, sammisaqarluni workshopernerit aammalu attaveqarfinnut aaqqissuussinerit.
Nunat ilaannut aningaasaliissutit
Nunani taakkunani pingasuni ilisimatuut ilisimatuunik allanik sulianik assingusunik aamma ilisimatuunik allanik sammisalinneersunik naapitsipput.
Soqutigisaqaqatigiiffiit arlaqartut eqqartorneqarput. Ilisimatuut akunnerminni piginnaanitik nukissatillu aammalu qaninnerusumik suleqatigiinnerup nunani avannarlerni nunallu assigiinngitsut akornanni peqataanerni qanoq atorneqarsinnaanersut eqqartorpaat. Nunat Avannarliit Killerni ataatsimoorussamik ilisimatusarnikkut suliniutini tapersiisinnaasumik aaqqiissuteqartoqarnissaa aamma soqutigineqarluarpoq.
Suleqatigiinneq ingerlaqqissaaq
GLISFO-workshopimi peqataasut Nunat Avannarliit Killerni ilisimatusarnermi suleqatigiinnerup ingerlatiinnarnissaat isumaqatigiissutigaat. Ukioq affakkaarlugit ataatsimeersuartarnissaq pilersaarutigineqalerpoq, Reykjavíkimilu Arctic Circle Assembly-mi ataatsimut ataatsimiinnissami ukiut tamaasa oktobarimi ingerlanneqartartumiinnissaa eqqarsaatigineqarpoq.
GLISFO suleqatigiinneq Nunatsinni Ilisimatusarnermik Siunnersuisoqatigiinnit, Rannis – Islandimi ilisimatusarfik Islandimilu Arktisk Samarbejdsnetværk peqatigalugit aaqqissuunneqarpoq. Workshoperneq 2022 aamma 2023-mi siunnersuisoqatigiit pingasuusut akornanni isumaqatigiissutaasut atuutilernerannit siullermeerluni ingerlanneqarpoq.
- GLISFO-workshopimit assit takuneqarsinnaapput uani.
- Rasmus Leander Nielsen apeqqarissaarfigineqarpoq – Rasmus Nunatsinni Ilisimatusarnermik Siunnersuisoqatigiit ilaasortaavoq aamma Nasiffimmi – Nunanut Allanut Sillimaniarnermullu Ilisimatusarfimmi lektori aamma aqutsisuuvoq.
