Nunatsinni Ilisimatusarnermik Siunnersuisoqatigiit 2022-mut ukiumoortumik nalunaarusiaat saqqummiuppaat.

Ilisimatusartut 2022-mi Nunatsinni Ilisimatusarnermik Siunnersuisoqatigiit qinnuteqartut katillugit 32 millioner koruunit sinnerlugit nalilinnik qinnuteqarput. Taakkunannga siunnersuisoqatigiit katillugit 12,8 millioner koruunit agguaappaat. Aningaasaliissutit nunatsinni ilisimatusarnerit pitsaanerpaat siuarsarnissaannut tapiissutaassapput, tassani ilisimatusartunik ilinniarnermut ilisimatusarnerullu inuiaqatigiinnut iluaqutaanissaanut nukittorsaanermut atugassiaallutik. Aningaasaliissutit ammasumik unammissutaasarput, sammisarlu apeqqutaaneq ajorluni.

Kalaallit Nunaanni ilisimatusarnerup silarsuaani 2022-mi pingaarutilimmik angusaqarpugut, tassa Naalakkersuisut ilisimatusarnermi periusissiaq 2022-30 atuuttussaq Ilisimatusarneq – ineriartornermut aqqutissaavoq atuutsinneqalermat. Periusissiaq susassaqarfimmi siullerpaavoq suleqatigiissutaallunilu Naalakkersuisut, Nunatsinni Ilisimatusarnermik Siunnersuisoqatigiit aamma nunatsinni ilisimatusarfiit akornanni.

Siulittaasup nalunaarusiaanni Josephine Nymand imatut allappoq:

“Kalaallit Nunaanni ilisimatusarnerup silarsuaa anginngilaq avataaniillu soqutiginnittunit peqataatinneqanngitsooratarsinnaalluni. Oqaluttuarisaanerup takutippaa avataanit ilisimatusartut Kalaallit Nunaannukariaannaasartut soqutigisatillu aallaavigalugit ilisimatusartarsimasut. Ullutsinni Kalaallit Nunaanni nunap iluani ilisimatusarneq nammineq sinaakkusernissaa isumagineqassaaq”.

Ukiumoortumik nalunaarusiaq ilisimatusernermik siunnersuisoqatigiit nammineq inuiaqatigiinnut nalunaarusiatut saqqummiussaat nalunaarusiamilu sammisat immikkut toqqakkat peqataaffigisagut ukkanneqarput.