Sisamanngorneq 20. april Schweizip ambassadøriata Ataqqinartup Florence Tinguely Mattlip tikeraarneranut aammalu Nunatsinni Ilisimatusarnermik Siunnersuisoqatigiit aamma Swiss Polar Institutep isumaqatigiissummik atsioqatigiinnerinut tunngalillugu ilasseqatigiinneq pivoq.

21. april 2023

Nunatsinni Ilisimatusarnermik Siunnersuisoqatigiit shweizimilu ilisimatusarnermut aningaasaateqarfik, Swiss Polar Institute, Memorandum of Understanding (MoU) atsiorpaat. Suleqatigiinnissamut isumaqatigiissut sisamanngorneq 20. april Ilinniartitaanermut, Kultureqarnermut Timersornermut Ilageeqarnermullu Naalakkersuisumit Peter Olsenimit Schweizillu ambassadørianit Ataqqinartumit Florence Tinguely Mattlimit atsiorneqarput.

Pinngortitami navianartorsiuutaasinnaasut nalilersorneri malinnaavigisiinnaanerilu
Isumaqatigiissut kalallit schweizimiullu ilisimatusartartut akornanni ileqqussanngortitsisuuvoq, tamannalu ukiuni kingullerni pingaarnerutillugu pinngortitami navianartorsiorfiusinnaasunik nakkutiginninnermi ineriartortinneqarsimalluni – ilaatigut Kalaallit Nunaanni qaqqamik ulorianartorsiorfiusooq Karrata Kangerluani qaqqaq 3-mik taaneqartartumi aaqqissuussaasumik nakkutiginninnissamut ineriartortitsinikkut Sisimiunilu aputip sisoornerani kalerrisaarisartussamik ineriartortitsinikkut.

”Ilisimatusarnikkut suleqatigiinneq assigiissuteqarfigut tunuliaqutigalugit pinngorpoq: qaqqat, aput sermerlu iigartartoq – pinngortitarsuaq sananeqaatitsinnut ilaasoq. Kalaallit Nunaanni silaannaap allanngoriartornerata kinguneri piffinnut allanut amerlanernut naleqqiullugu sukkanersumik sakkortunerusumillu malugaagut. Pisut naliginnaasuunngitsut takusimavagut; qaqqap sisunera Karrani tassaarsuartitsisoq; siku naatsorsoruminaassigaluttuinnartoq sermersuullu supinerata kingorna kuunnersuit. Ilisimasat ilisimatusarnerullu pisunik ingasattunik, ajunaarnersuarnik inunnillu annaasaqarnerit pinngitsoortissinnaapput”, Naalakkersuisoq, Peter Olsen peqataanermini oqarpoq.

Schweiziskemiut ambassadøria tikeraarpoq
Atsioqatigiinnermi nalliuttorsiorpalaartitsineq schweizimiut ambassadøriata, Florence Tinguely Mattlip tikeraarneranut atatillugu ingerlanneqarpoq. Taassuma nunanut allanut polilitikkini ilisimatusarnermi diplomatip pingaaruteqarnerujartornera ersarissarpaa.

”Ilisimatusartartut inimi maaniittut tamarmik ilisimavaat, nunat tamalaat akornanni suleqatigiit pilerkartut naalakkersuisoqarfinnik aallaaveqanngitsumik. Aamma taamaassaaq! Pingaaruteqarporlu suleqatigiinnerup naalakkersuisoqarfinnit akuersaarneqarnissaa, taperserneqarsinnaa aqqutissiorneqarnissaalu. Ilisimatusarnermi diplomati nunanut allanut politikkini suli pingaaruteqarnerujartorpoq qanimullu attaveqaatini ilisimatusarnermi suliat qaangerlugit nukittorsaalluni. Taamaammat aprilip aallartinnerani Schweizimut kalaallinik, aatsitassanut inatsisillu atuutsinneqarnerannut Naalakkersuisumit, Aqqaluaq B. Egede siuttoralugu tikeraartoqarnerput tulluusimaarutigaarput. Tikeraarnerat tigulluarneqarpoq kalaallit schweizimiullu suleqatigiinnissaannik pingaarutilimmik oqariartuuteqarluni”, pisumi ambassadørip oqaatigaa.

Suleqatigiinnermi sinaakkutit
Nunatsinni Siunnersuisoqatigiit aamma Swiss Polar Institutep suleqatigiinnerisa ilisimatusarnikkut suliniutit arlallit ingerlatissavaat, pinngortitami navianartorsiorfiusinnaasunut tunngasut, aammali allatigut. Suleqatigiinneq ilaatigut ’The Koni Steffen Grant’, tassaasoq kalaallit schweizimiullu suleqatigiinneranni ilisimatusarnerni suliniutinut aningaasaliisuusoq, aqqutigalugu ilusinippoq.

”Nunatsinni Ilisimatusarnermut Siunnersuisoqatigiinnut siunertaavoq nunat tamalaat akornanni ilisimatusarnikkut suleqatigiinnissap ineriartortinnissaa, nunatsinni ilisimatusarnerit pingaarnersiukkat ilisimasassatullu pisariaqartitat pissarsiariniarlugit. Taamaaliorniaraannilu Naalakkersuisut aningaasaliinissamik pingaartitsinissaaq pisariaqarpoq. Taamaammt Nunatsinni Ilisimatusarnermut Siunnersuisoqatigiit ilaatigut Naalakkersuisunut siunnersuutigaa nunat tamalaat akornanni ilisimatusarnermi suleqatigiinnissamut tapersiiniarluni aningaasaliisarnissamik pilersitsisoqarnissaa,” Nunatsinni Ilisimatusarnermut Siunnersuisoqatigiit, Josephine Nymand, oqarpoq.

Erseqqinnerusumik paasissutissat:
Allatsi Maliina Jensen, Nunatsinni Ilisimatusarnermut Siunnersuisoqatigiit, tlf. 361200/222090, mail: maje@natur.gl

Nunatsinni Ilisimatusarnermut Siunnersuisoqatigiinni siulittaasoq Nymand, tlf. 361234, mail: jony@natur.gl