Kalaallit Nunaanni Ilisimatusarnermik Siunnersoqatigiit qinnuteqaatit 11-it akornanni sisamat toqqarpaat, taakkulu ilisimatusarnermik siuarsaanissamut aningaasaliiffigineqassapput. Suliniutit silap pissusianut, avatangiisinut, peqqissutsimut inuiaqatigiilerinermik sammisaqarput assigiinngitsorpassuarnillu tunngassuteqarput, aammalu ilisimatusarnikkut pitsaassuseq, naleqquttuunerat aammalu Kalaallit Nunaanni ilisimatusarnermik ineriartortitsinermut tapersiinerat tunngavigalugit toqqarneqarsimallutik.

Suliniutit aningaasaliiffigineqartut ukuupput:

– NorthWhales: Outi Tervo, Pinngortitaleriffik, qilalukkat qernertat avannaani qanoq siaruaassimanerat, pissusilersuutaat aammalu kingornuttagaasut akornanni ataqatigiinnerat misissuiffigissavai, ilaatigut miljø-DNA aamma drone-t atorlugit.

– Ihuanneq: Manumina Lund Jensen, Ilisimatusarfik, Avanersuarmi nerisassat nerineqanngitsut pillugit ileqqut misissuiffigissavai, kiisalu silap pissusata allanngoriartornerata tamatuma ilisimasaqarfigineqarneranut qanoq sunniuteqarnera misissorlugu.

– MeatBorn: Mathilde Le Moullec, Pinngortitaleriffik, tuttu aamma umimmak pillugit nappaataasunik uumasuneersunik siaruaattumik misissuissaaq, kiisalu nuna tamarmi nakkutiginninnerup pilersinneqarnissaanut tunngavissiissalluni.

– 15-metodip nalilersorneqarnera: Birgit Niclasen, Kalaallit nunaanni peqqissusermik Ilisimatusarfik, imigassamik ajornartorsiutinik siusissukkut paasisaqarfiusinnaasumik aammalu iliuuseqarfiginninnermut tunngasumik periutsinik misileraassaaq.

Ukioq manna aningaasaliissutissanut qinnuteqaatit amerlasuut tiguneqarput, taakkunanngalu ilaasa piumasaqaatit naapissinnaasimanngilaat. Taamaattumik Nunatsinni Ilisimatusarnermik Siunnersoqatigiit qinnuteqaatit piumasaqaatinik naammassinnissimasut akornanni faginut tunngasunik nalilersuineq tunngavigalugu pingaarnersiuilluni toqqartuivoq.

Kalaallit Nunaanni Ilisimatusarnermik Siunnersoqatigiit siulittaasuat, Mari Kleist, oqarpoq:
“Suliniutit tapersersorniarlugit toqqarsimasavut immikkut ittumik ilisimatusarnikkut nukittussuseqarput aammalu Kalaallit Nunaanni inuiaqatigiinnut erseqqissumik attuumassuteqarput. Uagutsinnut pingaaruteqarsimavoq salliutinneqarnissaat ilisimatusarnerit, paasissutissaannaanngitsunik pilersitsitsut, kisianni aamma najukkami tunngaveqartunik aammalu nunatsinni piginnaasanik ineriartortitsinermut suleqatigiinnernullu tapertaasut.

Aammattaaq oqaatigineqassaaq suliniutinut qinnuteqartut amerlanersaasa ajornartorsiutit naleqquttut aallaavigisimagaat, kisianni qinnuteqaatit tamarmik ilisimatusarnermik siuarsaanermut aningaasaliissutit sinaakkutaasa iluanniissimanngitsut. Ukiaru ilisimatusarnermik siuarsaanermut aningaasaliissutit aamma agguaanneqaqqissapput, tassanilu piumasaqaataavoq qinnuteqaatit aningaasaliissuteqarsinnaanerup sinaakkutaannut siunertaannullu naapertuuttuunissaat.”

Suliniutit aningaasaliiffigineqartut Kalaallit Nunaanni nunanilu allani ilisimatusarfinnik suleqateqarlutik ingerlanneqassapput, aammalu ilisimasaqarnerulernermut aammalu nunami maani piginnaasanik ineriartortitsinermut iluaqutaassallutik.