Naalakkersuisut nuna tamakkerlugu ilisimatusarnermut periusissiaq, ilisimatusarnerup ineriartornissaanut ataatsimut siunnerfeqalersitsisoq, akuersissutigaat.
12. januar 2023
Naalakkersuisut ilisimatusarnermut periusissiaq nutaaq 2022-30-mi atuuttussaq, ”Ilisimatusarneq – Ineriartornermut aqqutissaq”, saqqummersippaat. Periusissiami ukiuni aggersuni Kalaallit Nunaanni ilisimatusarnermi ineriartortitsinissamut erseqqissumik ataatsimoorussamillu sinaakkuserneqarpoq, Nunatsinnilu Ilisimatusarnermik Siunnersuisoqatigiit aamma Kalaallit Nunaanni ilisimatusarfeqarfiit suleqatigalugit suliaalluni.
– Nunatsinni Ilisimatusarnermik Siunnersuisoqatigiinnut suliassaq pingaarneq tassaavoq Naalakkersuisut politikkikkut ilisimatusarnerup ineriartorneranut tunngatillugu siunnersuinissaq. Taamaammat nuannaarutigeqaara tulluusimaarutigeqalugulu periusissiaq nutaaq, erseqqissumik ataatsimoorussamillu sinaakkusigaq, ukiuni aggersuni nunatsinni pitsaanerpaamik ilisimatusarnermik qulakkeerinnittussaq, akuersissutigineqarmat, Nunatsinni Ilisimatusarnermik Siunnersuisoqatigiit siulittaasuat, Josephine Nymand, oqarpoq.
Anguniakkat pingaarnerit sisamat ilisimatusarnermut periusissiarmi allassimapput, taakkulu Naalakkersuisut takorluugaannik imaqarput:
- Ilisimatusarneq Kalaallit Nunaanni tunngaveqassaaq
- Ilisimatusarneq piujuartitsisussamik inuiaqatigiinnik ineriartortitsinermik tapersersuissaaq
- Ilisimatusarnermi angusat kikkunnit tamanit pissarsiariuminartuussapput
- Ilisimatusarnermi suliniut nunat assigiinngitsut akornannisulli qaffasissuseqassaaq
Anguniakkat pingaarnerit sisamaasut aallartisakkanik annerusumik 13-usunik taperserneqarput, ilaatigullu ilisimatusarfiit allisarnissaannut, ilisimatusarnermi ileqqorissaarnermut najoqqutassiornerup ineriartortinnerannut aammalu najukkani nunanilu assigiinngitsuni issittumi ilisimatusarnermut nukissat amerlinissaannut nukittorsaasussaallutik.
– Periusissiamik suliaqarnermi siunnersuinitsinni nunatsinni ilisimatusarnermi sinaakkutissat ataatsimut isigalugit, suliffeqarfitsigut, aningaasaqarniarnikkut ileqqorissaarnerullu nukittorsarnissaannut tunngasuupput. Kalaallit Nunaanni ilisimatusarneq ineriartussappat nunatsinni ilisimatusarnermi nukiit atorneqartussat amerliartornissaannik ilisimatusarnerullu pituttorsimanngitsuunissaanik piumasaqaatitaqarpoq. Ilutigalugu piffissaq ungasinnerusoq eqqarsaatigalugu ilisimatusarnerup ilisimatusartoqarnerullu ukkatarinissaa ataatsimoorlutalu kivitsinissarput pisariaqarpoq. Aammattaaq najukkani nunanillu assigiinngitsuni ilisimatusartut suleqatigiinnissaat pingaartissavarput sapinngisamillu inuiaqatigiinnut ilisimatusarnerup iluaqutaanissaa, ilaatigut ilisimatusarnermi ileqqorissaarnerup ineriartortinneratigut, qulakkiissavarput, Josephine Nymand oqarpoq.
Aana linkimi Kalaallit Nunaata ilisimatusarnermut periusissiaa.
Erseqqinnerusumik paasissutissat:
Nunatsinni Ilisimatusarnermik Siunnersuisoqatigiit siulittaasuat, Josephine Nymand: tlf.: 361234, e-mail: jony@natur.gl
Allatsi Maliina Jensen, Nunatsinni Ilisimatusarnermik Siunnersuisoqatigiit, tlf.: 361200/222090, e-mail: maje@natur.gl
