Ullumi Aningaasaqarnermut, Aatsitassanut Inatsitit atuutsinneranut naligiisitaanermullu Naalakkersuisup, Naaja Nathanielsenip, pinngortitami navianartut Kalaallillu Nunaanni upalungaarsimaneq pillugu workshopi ammarpaa.

8 marts 2022

Swiss Polar Institute aamma Nunatsinni Ilisimatusarnermik Siunnersuisoqatigiit sapaatip akunnerani uani Kalaallit Nunaanni pinngortitap navianartorsiortitsisinnaaneranik, soorlu qaqqap aputillu sisoornerinik, upalungaarsimanermullu tunngasut ilisimatusarnerit qanoq ilillutik schweizimiut ilisimasaasa iluaqutaasinnaanerat eqqartorpaat. Suleqatigiinneq sermersiuup/glaciologip Konrad Steffenip Kalaallit Nunaanni Swiss Campimi 2020-mi alianartumik toqunerata kingora pilersinneqarpoq.

Pinngortitap navianartorsiortitsisinnaaneranik ilisimasallit kalaallit schweizimiullu 29-it ullumi Kalaallit Nunaanni pinngortitami ajunaarnersuaqarnissaa, soorlu qaqqap aputillu sisoorneri, pinngitsoortinniarlugit iliuuserisariaqakkat pillugit ilisimatusarnissat suut pisariaqartinneqarnersut eqqartuipput. Peqataasut tassaapput ilisimatusartut inuusunnerit, aammali professorit, attuumassutillit Kalaallillu Nunaanni suliaqartut aaqqissuussaneersut Namminersorlutillu Oqartussaneersut.

Nunatsinni Ilisimatusarnermik Siunnersuisoqatigiit siulittaasut Josephine Nymand oqarpoq:

Neriuppugut uani suleqatigiinni pilersitatsinni piffissaq sivisunerusoq eqqarsaatigalgu Kalaallit Nunaanni pinngortitamik navianartut pillugit ilisimasanik avitseqatigiittoqarnissaanut ingerlatsisinnaajumaarluta. Schweizimiut tassunga tunngasumut pikkoreqaat, nunallu tamalaani ilisimatusarnikkut suleqatigiinneq Kalaallit Nunaanni nuna tamakkerlugu nakkutilliinikkut upalungaarsimanikkullu piginnaanernik ineriartortitsinissamut pingaaruteqarluinnarpoq.