Kalaallit Nunaata Danmarkillu 2021-mi aningaasatigut inatsisaata Kalaallit Nunaanni inuusuttunik piginnaasanik ineriartortitsiniarlutik ilisimatusartussarsiornissamut 7,5 mio. kr-it qulakkeerneqarput.

Ph.d-liortunut postdoc-inullu qinnuteqarnissaq aallartereerpoq, nutaatullu allanik peqateqarluni, ass. suliffeqarfinnit, aningaasaleeqataasoqalersinnaanngorpoq.

Nunatsinni Ilisimatusarnermik Siunnersuisoqatigiit siulittaasuata, Josephine Nymandip aaqqiissut nutaaq nuannaarutigaa: ”Suliffeqarfiit ilisimatusarfiillu suleqatigiinnerisa ilisimatusarneq ilaatigut nukittorsarsinnaavaat, illuatungaanilu ilisimatusarnerup Kalaallit Nunaanni suliffeqarfinnut suliffeqarfittut ineriartornissamut periarfissaalluarluni. Tamanna ukiuni kingullerni ilisimatusarnermut atatillugu suliffeqarfimmik suleqateqarnermi, ilaatigut immap naqqani Ikkap sukaaniittut qeqqussat enzymiisa errorsinermut qaqorsaatini nerisassanillu asiunaveersaanissamut atorneqarsinnaanerinik misissuinermi, kiisalu takornariaqarnermi ineriartortitsinermi misilittagaqarfiusumi, takuneqarsinnaavoq.”

Ph.d-liortunik postdoc-inilluunniit aningaasaleeqateqarneq

Suliffeqarfiit inuusuttut ilisimatusartut aningaasaleeqataaffigerusukkunikkit ilaatigut ukiumut, imaluunniit akissarsiaqarnerulersitsinermut aningaasaleeqataasinnaapput, aammalu ilaatigut ilisimatusarfimmut seqersitsivimmik aningaasaleeqataallutik. Suliffeqarfiit taamaalillutik pisortaqafiillu ataatsimoorlutik suliffeqarfinnik pilersitsisinnaapput Kalaallillu Nunaanni aallaaveqartumik ilisimatusarnermi aningaasanik kaaviiaartitsilerlutik.

Namminersorlutik Oqartussat suliffeqarfinni siuarsaanermi aaqqiissutaat aamma suliffeqarfiit ineriartornerat ilisimatusarnermik aallaaveqartumik atorneqarsinnaavoq, ilisimalikkallu niuernermut atorneqarsinnaalersillugit.

”Nunatsinni Ilisimatuarnermik Siunnersuisoqatigiit ilisimatusarneq pituttugaanngitsoq tapersersugaraat, ilinniarnermummi, inuiaqatigiinnut suliffeqarfinnullu iluaqutaasussaammat.

Ilisimatusarnerup Kalaallit Nunaanni suliffeqarfinnut attuumassuteqalernera periarfissarpassuarnik ammaavoq. Taamaammat nuannaarutigaarput aningaasaleeqataasoqarsinnaanngormat, taamaaliornikkummi suliffeqarfinnik suleqateqarnerit nunatsinni toqqammavileeqataasussaasut suliffeqarfinnut inuiaqatigiinnullu iluaqutaasussaapput”, Josephine Nymand oqaluttuarpoq.

Qinnuteqarfissat sammivinni tamani qinnutigineqarsinnaasut Pinngortitaleriffimmit allaffissornikkut ingerlanneqarpoq.