Nunatsinni Ilisimatusarnermik Siunersuisoqatigiit maanna upernaamut ilisimatusarnermik siuarsaanermi aningaasaliissutinut kingusinnerpaamik 1. marts 2022 qinnuteqaqquneqarput. Ilisimatusarnermi sammiviit tamarmik qinnuteqarsinnaapput.
Januarip 24-ani 2022
Aningaasaliisarfiup ilisimatusarnerit nutaamik eqqarsarnermik tunngavillit aammalu Kalaallit Nunaanni ingerlanneqartut aningaasaliiffigissallugit siunertaraa.
Siunnersuisoqatigiit aningaasaliinissamut piumasaqaatigaat ilisimatusarfiit Kalaallit Nunaannut attuumassuteqarnissaat. Ilisimatusarnerup pitsaassusaata saniatigut siunnersuisoqatigiit ilisimatusarnerup inuiaqatigiinnut iluaqutaanissaa sunniuteqarsinnaanissaalu pingaartittorujussuuaat.
Nunatsinni Ilisimatusarnermik Siunnersuisoqatigiit ilisimatusarnermik siuarsaanermi qinnuteqarnissamut tunngasumik webinareqartitsissapput sisamanngorneq 3. februar 2022 nal. 13-14 GMT-3 Kalaallit Nunaanni nalunaaqutaq malillugu.
Qinnuteqarnermi piumasaqaatit siunnersuisoqatigiillu ilisimatusarnermik siuarsaanermi nalilersornissaanullu tunngaviusartunik saqqummiussiniarpugut.
