Nunatsinni Ilisimatusarnermik Siunnersuisoqatigiit ilisimatusartartut tallimat aallarnisaanernut nutaanut innuttaasunut ilisarnartunut, atorneqarsinnaanissaannullu sammisunut ineriartortitsinissamut pituttorsimanngitsumillu ilisimatusarnissamut aningaasaliiffigineqarput.
15. december 2022
Ilisimatusarnerni aqutsisuusut tallimat, Nunatsinni Ilisimatusarnermik Siunnersuisoqatigiinnik aningaasaliiffigineqarnermikkut, maanna ilisimatusarnermi suliniutit tallimat aallartissinnaanngorpaat. Siunnersuisoqatigiit suliniutinut ilisimatusarnermik nutaaliornermillu tunngaveqartut ineriartortitsinissaannut millionit affaanik kroninik nalilinnik agguaapput.
Nunatsinni Ilisimatusarnermik Siunnersuisoqatigiit siulittaasuat, Josephine Nymand aningaasaliinermut tunngatillugu imatut oqaaseqarpoq:
– Isumassarsiat pitsaasut ilisimatusarnermillu nutaaliornermillu tunngavilinnik ilisimatusarnerup ineriartortitsinissaasanut pitsaasunik sinaakkuteqarnissaq pingaaruteqarpoq. Takusinnaavarput ilisimatusartartut, suliffeqarfiit aammalu innuttaasut inuiaqatigiit akornanni pisariaqartunik paasisaqarnermikkut soqutiginartunik suleqatigiissutaasunik aaqqiiniarlutik suliniutinik arlalinnik ingerlatsisoqartoq. Tamannalu apeqqusiinata tapersersorsinnaavarput.
Onlinekkut aliasuummik katsorsaanissamut ineriartortitsinermut aningaasaliineq
Suliffeqarfiit aningaasaliiffigineqartut ilagaat Ilinniartunut siunnersuisarfik Namminersorlutik Oqartussat ataani Center for National Vejledning. Taakku Kalaallit Nunaanni onlinekkut aliasuummik katsorsaanermut suliniummik nutaamik ilinniartunut aallartisaassapput.
Suliniut aallarniutaasoq misilittakkat ilinniartullu onlinekkut aliasuummut katsorsartillunik peqataasut innersuussutaat aallaavigalugit aliasuttut akuliuffigalugit oqaloqateqariaaseq nutaaq atuisuusut ilinniartut peqatigalugit ineriartortissavaat.
– Inuusuttut pisariaqartitaat aallaavigalugit inuusuttut ikiorniarlugit tulluartumik akuliulluni oqaloqatiginneriaatsit ineriartortinnissaat inuiaqatigiinni annertuumik pisariaqartinneqarpoq, tarnip pissusaanik ilisimasalik ilisimatuarnermilu ikiorti Ilinniartunut siunnersuisarfimmeersoq, Susanne Vendelbo, oqaluttuarpoq.
Ilinniartunut siunnersuisarfimmi aallartisarneqartoq aqqutigalugu inuiaqatigiinni unammilligassani annerpaasumut imminut toquttarnerup aliasunnerullu eqqartornerunissaanut aqqutaassaaq.
Ilisimatusartoqatigiit nalunaarusiaq, Qamani, ukioq manna septembarimi MIO-mit saqqummersitinneqartoq tikkuarpaat, tassani inuusuttorpassuit aliasunnerminnik aammalu ass. ilaquttat imaluunniit ikikkunngutit imminnut toqussimanerannut tunngatillugu imminut pisuutinneq kanngusunnerlu pillugu oqaloqateqarnissaminnik annertuumik pisariaqartinneqartut ersermat. Nalunaarusiaq malillugu inuusuttut ilisimaneq ajorpaat aliasutsillutik sumut saaffiginnissinnaanerlutik, aammalu neqeroorutaareersut, ass. tarnip pissusaanik ilisimasalimmut ikiortinnissaq, naammanngitsoq naleqquttuunngitsorluunniit. Inuusuttut arlallit oqaluttuarput ilaquttamik toquneranik aliasunnermi namminneq imminut toqunnissamik eqqarsaateqarsimasut.
Ilinniartunik siunnersuisarfik lektor ilisimatusartartorlu Anja Hvidtfeldt Stanek, Institut for Psykologi ved Syddansk Universitetimeersoq suleqatigalugu ilisimatusarneq ingerlatissavaat. Erseqqissaantigineqassaaq taamatut suliniut pineqartoq Ilinniartunut siunnersuisarfimmit aallartisarneqarmat maannamullu Namminersorlutik oqartussat imminut toquttarnermut pinaveersaartitsineranut ilaanani.
Suliniutit aningaasaliiffigineqartunut takussutissiaq:
| Ilisimatusarnermut aqutsisoq | Suliniutip taaguutaa | Suliffeqarfik |
| Anja Hvidtfeldt Stanek | Aliasunneq – unge studerendes perspektiver på online sorggruppe | Ilinniartunut siunnersuisarfik, Center for National Vejledning, Namminersorlutik Oqartussat aamma Syddansk Universitet |
| Maria Ackrén | Foreign- and security policy opinion poll in Greenland | Nasiffik – Nunanut allanut sillimaniarnermullu ilisimatusarfik, Ilisimatusarfik |
| Anne Lisbeth Schmidt | Skinddragter Online – Fornyelse og fremtidssikring af kulturhistorisk genstandsbases website | Danmarks Nationalmuseum aamma Nunatta Katersugaasivia Allagaateqarfialu |
| Pernille Jensen | Writing a proposal to develop WASH solutions for Arctic communities | Arctic DTU – Ilinniarfeqarfik Sisimiut |
| Thomas Ingeman-Nielsen | Feasibility study towards the GSIS – Greenland Snow and Ice Service | Arctic DTU – Ilinniarfeqarfik Sisimiut |
Erseqqinnerusumik paasissutissat:
Allatsi Maliina Jensen, Nunatsinni Ilisimatusarnermik Siunnersuisoqatigiit, tlf. 361200/222090, mail: maje@natur.gl
Nunatsinni Ilisimatusarnermik Siunnersuisoqatigiivisa siulittaasuat Josephine Nymand, tlf. 361234, mail: jony@natur.gl
