Arctic DTU – Ilinniarfeqarfik Sisimiuni ilisimatusarnermi suliaasup nutaap Sisimiut Kangerlussuullu akornanni nunap qeriuaannartup siaruaqqanerata assiliorneqarneranik kinguneqassaaq; ilisimalikkat nunami pineqartumi isumannaatsumik piujuaannartitsisumillu nunap atortulersornissaanut pingaaruteqartorujussuussapput.
Ulloq saqqummerfia: 11. maj 2021
Nunatsinni Ilisimatusarnermik Siunnersuisoqatigiinnit aningaasalikkamik postdociliarineqartussami, Arctic DTU – Ilinniarfeqarfik Sisimiuni ilisimatusartoq Marco Marceri Sisimiut Kangerlussuullu akornanni qaqqat sivinganertaani nunamik qeriuaannartumik misissuinissamut attaveqarfissanik aallartisartussanngorpoq.
Nunap qeriuaannartup siaruaqqanerata nunallu taassuma silaannaap kiatsikkiartornerani malussarissusaata assiliornerani, ilisimatusartut nunap sisoorsinnaaneranut nerioriartorneranullu navianassusaa naatsorsornerulersinnaassavaat; ilisimasaq isumannaatsumik nunap atortulersornissaanut sanaartorfiunissaanullu pingaaruteqartussaq.
Sisimiut-Kangerlussuullu akornanni nunap misissuiffigisap nalaani silap pissusaata allanngorarnerpassuisa misissornerini ilisimatusartut tassani nunap qeriuaannartup siaruaqqanera nassuiaasiorsinnaalissavaat; piffissarlu ungasinneq eqqarsaatigalugu ilisimalikkat kitaata sineriaata annersaani aamma atorneqarsinnaalissalluni:
”Sisimiuniit Kangerlussuarmut nunataa sineriammiit nunaviusup silaannaata nalaaniippoq, aammalu nunap ilusaa allanngorartuulluni. Nunap allanngorarnerujussuata malinnaaviginerata Kalaallit Nunaata kitaata ilarujussuanut misissuinissamut ikaarsaarnissamut tunngaviliisinnaassaaq”, Marco Marcer oqaluttuarpoq.
Ukiuni tulliuttuni nunami pineqartumi angallattoqarnerulernissaa nunallu atortulersornerulernissaa Qeqqata Kommuniata naatsorsuutigaa. Tamassuma takornariaqarnerup ineriartornissaanut aallartisaataalluarnissaa naatsorsuutigineqarpoq, ilaatigut UNESCOp Aasivissuit-Nipisat nunarsuarmioqatigiinnut kingornussassanngortinneqarnerata kingunerisaanik peqquteqartumik.
| Nuna qeriuaannartoq: Pinngortitap nukinga isaannarmik takuneqarsinnaanngitsoq
Nunarsuup avannaata sisamararterutingajaata nunataa qeriuaannartuuvoq. Nunap qeriuaannartup nuna allanngujaatsuutippaa; nuna ussissuutippaa quppani sikoqarnikkut maavaartussaagaluaq qerisuutillugu. Silaannaalli kiatsikkiartornerata nuna qeriuaannartoq aatsittarpaa, nunalu aqililluni sisoorsinnaallunilu neriulersinnaasarpoq, taamaaligaangamilu inoqarfinnut ajoqutaalersinnaalluni. Nunap qeriuaannartup allanngornera qaqqap sisoornerata kingunerani Karrat kangerluanni Illorsuarnilu 2017-imi tassaarsuarnera peqqutaaqataasimasinnaavoq. |
