Nunatsinni Ilisimatusarnermik Siunnersuisoqatigiit ilisimatusarfiusunut tallimaasunut, Kalaallit Nunaanni ilisimatusarneq aqqutigalugu siunissami iluaqutaasussanik aammalu siuarsaanermut tunngassutilinnut 10 mio. koruunit agguaappaat.
Ulloq saqqummerneqarfia: 3. maj 2021
Nunatsinni Ilisimatusarnermik Siunnersuisoqatigiit ph.d-nngornianik postdoc-inillu tallimaasunik aningaasaliinerminni ilisimatusartut piukkunnaatillit piginnaanillillu kinguaariit tulliuttut tunngavissippaat. Ilisimatusarnikkut suliat sammivii siammasissuupput ilisimasanillu nutaanik inuaqatigiinnut ilisimatusarnernullu allanut iluaqutaasussanik imaqarlutik.
”Sammisani assigiinngitsuni siornatigut ilisimatusarfiusimanngitsuni ilisimatusartut nutaanik paasisasaqartarput. Sammisarpassuupput ilisimasaqalerfiusuni inuiaqatigiinni unammillernarsinnaasunut assigiinngitsuni iluaqutaasinnaasut; ilisimasat ingerlatsivinni suliffeqarfinnilu aalajangiisartunut tikkuussisinnaasut. Taamaammat nuannaarutigeqaara ukioq manna aningaasaliinitsinni ukiuni tulliuttuni ilisimatusartut ilisimalikkaminnik pingaaruteqartunik tunniussisinnaanissaannut periarfissillugillu nunatsinni ilisimatusarneq nukittorsarneqassammat”, Josephine Nymand, Nunatsinni Ilisimatusarnermik Siunnersuisoqatigiit siulittaasoq oqaluttuarpoq.
Ph.d-nngorniat postdoc-illu 2021-imi qinnuteqartut 20-usut 25 %-ii, qinnuteqartut amerlassusaat aallaavigissaganni, siunnersuisoqatigiit aningaasaliiffigisinnaasaat iluatsipput.
Ph.d-nngorniutit pingasut aningaasaliiffigineqartut:
• Mille Bianco Schiermacher suliaalu ’Isumaginninnermut politikki ajutooraangat – kalaallit inuusuttut pisariaqartitsisut nuna qimallugu nuunnermi sullinneqarnerat iluatsinngitsoq’ / ’Når socialpolitikken svigter – mislykket migration blandt udsatte grønlandske unge’.
• Ivalo Arnfjord suliaalu ’Kalaallit Nunaanni meeqqat meeqqeriviat – inuuniutitut, takorluukkatut meeqqallu tungaannit’ / ’Børnenes børnehave i Grønland – mellem profession, vision og børneperspektiv’.
• Mie Vilstrup Møller suliaalu ’Kalaallit Nunaanni nunarsuaq tamakkerlugu tuniluunnermik Covid 19-imik isiginniffiit’ / ’Aspekter af Covid-19 pandemien i Grønland’.
Postdoc-nngorniat marluk aningaasaliiffigineqartut:
• Marco Marcer Arctic DTU – Ilinniarfeqarfik Sisimiuneersoq suliaalu’Siku Aajuitsoq’.
• Sandra Maier ved Pinngortitaleriffimmeersoq ’Drivers and function of Greenlandic benthic biodiversity today and in the future’.
