Nunatsinni Ilisimatusarnermik Siunnersoqatigiit matumuuna 2026-imut ilisimatusarnermik siuarsaanermut aningaasaliissutinut qinnuteqaatinik pissarsiorput.
Ilisimatusarnermik siuarsaanermut aningaasaliissutit siunertaraat Kalaallit Nunaanni ilisimatusarnerup inuiaqatigiinnut iluaqutaasumik siuarsarnissaa nukittorsarnissaalu. Ilisimatusarnerup iluani sammisanut pingaarnernut tamanut qinnuteqartoqarsinnaavoq, aningaasaliissutillu sammisaq aalajangersimasoq killigitinnagu ammasumik unammillernikkut agguaanneqartarput.
Nunatsinni Ilisimatusarnermik Siunnersoqatigiit pingaartippaat ilisimatusarneq najukkami tunngaveqassasoq aammalu Kalaallit Nunaanni ilisimatusartunik suleqatinillu ingerlanneqarlunilu aqunneqassasoq. Taamaattumik qinnuteqartut nassuiaateqassapput najukkami suleqatit innuttaasullu qanoq peqataatinneqassanersut, suliniut Kalaallit Nunaanni Ilisimatusarnermut Periusissiamut qanoq tapersiissanersoq, kiisalu ilisimatusarneq Kalaallit Nunaanni piginnaasanik ineriartortitsinermut ilisimasanillu avitseqatigiinnermut qanoq tapersiissanersoq.
Kikkut qinnuteqarsinnaapput?
Qinnuteqaatit Kalaallit Nunaanni ilisimatusarfimmut attuumassuteqassapput.
Uku qinnutigineqarsinnaapput:
- 150.000 kr.-it tikillugit suliniutinut ataasiakkaanut, Kalaallit Nunaanni ilisimatusarfik ataaseq peqataappat.
- 300.000 kr.-it tikillugit suliniutinut, Kalaallit Nunaanni ilisimatusarfiit minnerpaamik marluk suleqatigiillutik peqataaffigisaannut, aammalu aningaasartuutit ilisimatusarfiit peqataasut akornanni naapertuuttumik agguarneqarsimappata.
Qinnuteqarnissamut killigititaq
1. oktober 2026
Qinnuteqarnissamut atortussat
Qinnuteqaat qinnuteqarnissamut immersugassami atuuttumi immersorneqassaaq, ilanngussallu piumasaqaatigineqartut ilanngullugit nassiunneqassalluni.
Qinnuteqaat ilaatigut suliniutip nassuiarneqarneranik, missingersuutinik, CV-mik kiisalu saqqummersitanik allattorsimaffimmik imaqassaaq, aammalu ilisimatusarfiup qinnuteqaat aqutsisussap akuersineranik uppernarsaat ilanngunneqassalluni.
Ilitsersuut qinnuteqarnissamullu immersugassaq
Piumasaqaatit, qinnuteqarnissamut maleruagassat, missingersuusiornissamut ilitsersuutit, nalilersuinermi tunngavigineqartut kiisalu paasissutissat allat ilitsersuummi atuarneqarsinnaapput.
Qinnuteqarnissamut immersugassaq ilitsersuut ilanngullugu ataani aaneqarsinnaapput.
Apeqqutit
Nalunaarut qinnuteqarnerlu pillugit apeqqutit Nunatsinni Ilisimatusarnermik Siunnersoqatigiit allattoqarfiannut nassiunneqarsinnaapput uunga nis@nanoq.gl imaluunniit sianerluni +299 34 68 23.