Ilisimatusarnermi festivalip Greenland Science Week-ip ingerlanerani Kalaallit Nunaanni ilisimatusarnermit saqqummiinerit, assinik saqqummersitsinerit filmiliallu peqataaffigineqarsinnaassapput. Festivalimi ilisimatusartut innuttaasullu naapinnissaanik pileritsiffiullunilu ilisimatusarneq, nutaamillu eqqarsarsinnaaneq aqqutigalugu inuiaqatigiinni unammilligassat qanoq aaqqinneqarsinnaanersut sammineqassaaq.
Tusagassiutitigut nalunaarut 3. november 2021
Ilisimatusarnermi festivali Greenland Science Week imassaqarluarluni piareeqqavoq. Qilalukkat, Nunarsuarmioqatigiinni kingornussassat, takornariaqarneq piujuaannarnissamillu eqqarsarsinnaaneq tassaapput ukioq manna Nuummi, Sisimiuni, Sarfannguani Kangerlussuarmilu 3.-12. novembari sammisassat ilaannaat.
Ilisimatusarnermi festivali Nuummi Sisimiunilu suliffeqarfiit arlallit suleqatigiinneranni pilersinneqarpoq siunertaralugulu ilisimatusarnermi ilisimalikkat inuiaqatigiinnut apuunnissaat.
”Sammisassat pissanganartut siammasissut tamanut aaqqissuunneqarput, taamaalillutik ilisimatusarneq nalliuttorsiutiugalugu innuttaasunullu ilisimalikkanik paasisanik nutaanik, unammillernartunik misileraaffiusunillu apuussiffiussalluni. Greenland Science Week aqqutigalugu ilisimatusarneq inuiaqatigiinnut tikinneqarsinnaasunngorlugu, naleqquttumik pissanganartumillu paasisaqarfiussaaq, ilisimatusarnermilu inerniliinerit tigussaasunngussallutik,” Josephine Nymand, Nunatsinni Ilimatusarnermik Siunnersuisoqatigiinni siulittaasoq festivalimullu aaqqissueqataasoq, oqaluttuarpoq.
Saqqummiinerit, assinik saqqummersitsinerit filminillu takutitsinerit
Ilisimatusarnermi paasisat allaatigisaannaaneq ajorput. Aamma ilisimatusartut namminneerlutik assilisarisinnaavaat, filimiliaralugit pissanganartumilluunniit saqqummiullugit.
Assit filmillu ilisimatusarnerup silarsuaanneersut ilisimatusarnikkut sulianut tiguartinnartunngorlugit takutitsisinnaapput. Taamaamat ukioq manna Greenland Science Week-imut atatillugu assinik saqqummersitsisoqarlunilu filmertitsisoqassaaq taamaalillugu ilisimatusarnerit paasiuminaassinnaasumik allaaseriinnarnagit assinngorlugit nassuiarneqarsinnaaniassammata.
Kalaallit Nunaanni ilisimatusartut sumit tamaneersut ilisimatusarnerminni paasisatik nutaanerpaat saqqummiuteqattaassavaat, seminarillu assigiinngitsut workshopernerillu ingerlanneqarneritigut ilisimatusarnermi alloriarfiusinnaasut tullii katersorneqassaput aammalu ilisimatusarneq nutaamillu eqqarsarsinnaaneq aqqutigalugu qanoq inuiaqatigiinni unammilligassanik aaqqiissutissanik aallerfiusinnaaneranik oqallinnermik imaqassalluni.
Festivalimi aaqqissuusinernut peqataaneq akeqanngilaq. Aaqqissuussamut pilersaarut Greenland Science Weekip nittartagaani nassaarineqarsinnaavoq www.scienceweek.gl
Ilisimatusarnermi festivali taperserneqarpoq ukungannga: Nunatsinni Ilisimatusarnermik Siunnersuisoqatigiit, Arctic Hub, Ilisimatusarfik, Silap Pissusianik Ilisimatusarfik, Arctic DTU – Ilinniarfeqarfik Sisimiut, Carlsbergfondet, Royal Greenland, Kommuneqarfik Sermersooq aammalu Qeqqata Kommunia.
Greenland Science Week pillugu
Greenland Science Week (GSW) ilisimatusarnerup silarsuaani assigiinngitsutigut aaqqissuussineruvoq Kalaallillu Nunaanni ilisimatusarnernik nittarsaaffiulluni. Nittarsaaffik attaveqaatinik pilersitsiffiuvoq, ilisimasanik tunioraaffiulluni Kalaallillu Nunaanni nunallu tamalaat akornanni ilisimatusarnikkut suleqatigiiffiulluni, ilisimatusarnermut soqutigisalinnut, suliffeqarfinnut inuiaqatigiinnullu saaffiginnittuulluni.
GSW ulluni marlunni ataatsimeersuarniullunilu ”Arctic Research Days”-imik taaguutilik, Sisimiuni Nuummilu ilisimatusarnermi festivaliuvoq. GSW siullerpaamik 2019-imi ingerlanneqarpoq.
Suliffeqarfiit Greenland Science Week-imut peqataasut tassaapput: Nunatsinni Ilisimatusarnermik Siunnersuisoqatigiit, Ilisimatusarfik – Ilisimatusarfik, Pinngortitaleriffik, Sila Pissusianik Ilisimatusarfik, Asiaq – Greenland Survey, Arctic DTU – Ilinniarfeqarfik Sisimiut, AAU Arctic, Arctic Hub, Kommuneqarfik Sermersooq aamma Qeqqata Kommunia.
Attaveqarfissaq
Maliina Jensen, allatsi, Nunatsinni Ilisimatusarnermik Siunnersuisoqatigiit, e-mail: malj@nanoq.gl, tlf. 222090
