Nunatsinni Ilisimatusarnermik Siunnersuisoqatigiit innersuussutaat malillugu Peqqissutsimut Naalakkersuisup ilisimatuarnermi ileqqorissaarnissamut ataatsimiititaliami ilaasortat sisamaasut toqqarpai. Ataatsimiititaliap peqqissutsimut ilisimatusarnerit illersorneqarsinaasumik ingerlanneqartarnissaat qulakkeertussaavai.
Ataatsimiititaliaq nakorsatut ilaasortanik marlunnik inuinnartullu ilaasortat marlunnik inuttaqarpoq, Nunap immikkoortuani nakorsaq Ilisimatusarfimmilu ataqqinaammik ilaasortaasoq, Gert Mulvad, siulittaasutut qinigaaqqippoq.

Ilaasortat
• Gert Mulvad, MD, Doc Ph.d. hc., nunap immikkoortuani nakorsaq, DIS – nakorsatut ilaasortaq
• Karsten Rex, MD. Ph.d., DIH-mi immikkoortortaqarfimmi nakorsaq, – nakorsatut ilaasortaq
• Aviâja Egede Lynge, Msc., Meeqqat oqaaseqartartuat, MIOmi aqutsisoq – inuinnartut ilaasortaq
• Emma Kristensen, B.A., Pinngortitaleriffimmi siunnersortit pisortaat – inuinnartut ilaasortaq

Ilaasortat inuttut piginnaasartik aallaavigalugu ukiuni sisamani qinigaasarput. Ilisimatuarnermi ileqqorissaarnissamut ataatsimiitaliap allatseqarfia Nakorsaanerqarfimmit ingerlanneqartarpoq.

Innimiginninnerup eqqarsaatigilluartarnissaa
Ilisimatusarnermi peqqissutsikkut paasissutissat uumassusillillu aatsaat taamak katersorneqartarput, toqqorneqarlutik, atorneqarlutik, atassuserneqarlutik atorneqarlutillu. Ilisimatusartunit, peqqinnissaqarfimmit inuiaqatigiinnit aammalu napparsimasut peqatigiiffiannit peqqissutsikkut paasissutissat pisariaqartinneqaraluttuinnarput.
Ullumikkut inunnit, aaversinnernit imaluunniit inuit ipiutaasartaannik peqqissutsikkut misissorniarlutik qinnuteqaatit ilisimatuarnermi ileqqorissaarnissamut ataatsimiititaliap suliarisarpai. Ataatsimiititaliap ukiumut qinnuteqaatit 20-t missaanni amerlassusillit tigusarpai.
Ilisimatusarnerit illersorneqarsinnaasumik ingerlanneqartarnissaannut illuatungaani Peqqinnissaqarfiup ilisimatusarnikkut paasisat tunngavigalugit passussinissamut pisariaqartitaanik illuatungaanilli inuit misilittaaffigineqarsinnaanerinik killissamik qaanngiinnginnisamut isumaliutiginninnernut oqimaaqatigiissaarisarneq sunneeqataasarput.
Allatut oqaatigalugu naliginnaasuuvoq peqqissutsikkut ilisimatusarnermi eqqarsaatigilluaqqaagassat amerlammata. Aappimik/naamimilluunniit inernerit akuttusoorujussuupput.

Digitaliusumik qinnuteqarnerup nutaap nalunaarsuineq pitsaanerusoq qulakkiissavaa
Nunatsinni Nakorsaaneqarfimmi Kalaallit Nunaanni peqqissutsikkut ilisimatusarnissamut digitaliusumik qinnuteqartoqarsinnaalernissaa sulissutigineqarpoq. Maannamiit qinnuteqaatit suliniutillu akuerisaasut sullissivik.gl-kkut katersorneqartalissapput. Tassuuna peqqissutsikkut suliniutit suut ingerlanneqarnersut uumassusillillu katersat sumi toqqorsimatinneqarnersut pitsaanerusumik nalunaarsorneqalernissaat qulakkeerneqassaaq.