Kalaallit Nunaanni Ilisimatusarnermik Siunnersuisoqatigiit pingasunik nutaanik ilaasortaqalerput, taamaalillutik ilisimasaqarluarnertik tunuliaqutigalugu Kalaallit Nunaanni aallaaveqartumik ilisimatusarnermik siuarsaaqataasussanngorlutik. Siulittaasoq Josephine Nymand aammalu ilaasortat allat sisamaasut qinigaaqqipput.
Ilaasortanik pingasunik nutaanik qinersinerup Kalaallit Nunaanni Ilisimatusarnermik Siunnersuisoqatigiit ingerlatsiinnarnissaminnut aammalu siunnersuisoqatigiit suliaqarnerminni , ilaatigut ilisimatusarfinni Kalaallit Nunaannut tunngassutilinnut ilisimatusarnermi suliniutinik toqqaanissamik aningaasaliinissamillu imaqartumi, nutaanik nukissaqalernerat qulakkeerpoq. Siunnersuisoqatigiinni ilaasortat allat peqatigalugit ilisimatusarluni ilinniarnermut aningaasaliissutit ukiumut 7,5 mill. kr.-it tungaanut naleqartut aammalu ilisimatusarnermi aningaasaliissutit allat 1,2 mill. kr.-it tungaanut nalillit agguaattussaavaat. Siunnersuisoqatigiit aamma Kalaallit Nunaanni ilisimatusarnermi suliniutit ilisimatusarnermut naalakersuisumit, Naalakkersuisunit, Inatsisartunit nunanillu tamalaanit soqutigisallit ilisimatusarnerup silarsuaani apeqqutaat pingaarnersiuinerillu aallaavigalugit siunnersuisuussapput.
Qinigaaffimmi nutaami ilisimatusarnerit Kalaallit Nunaannit aallaaveqaannarnissaat suliniutini ingerlatiinnassavarput, siulittaasoq Josephine Nymand oqaluttuarpoq:
– Ilisimatusarnermik Siunnersuisoqatigiit ilisimatusarnerup sapinngisamik inuiaqatigiinnit aallaaveqarnerunissaat sulissutigaat. Ilisimatusarnerup Kalaallit Nunaanni ingerlanneqarnerata ilisimalikkat ineriartortinneqarnerat piginnaaneqarnerillu nunatsinniiginnarnissaannut iluaqutaassaaq. Pingaartumik nunanit allanit ilisimatusarnerit Kalaallit Nunaani ilisimatusarnernut attuumassuteqarnerat ukkatarineqarpoq. Tassuunakkut suleqatigiinnerup pilersinneqareersup pitsaassusaata nukittorsarnera ingerlatiinnassavarput, ilisimatusarnerlu ingerlanneqartoq inuiaqatigiinnut sunniuteqarluarnissaa paasissutiginissaalu qulakkeerlugu.
Ilaasortat nutaat
Aviaja Lyberth Hauptmann, ph.d., postdoc Kalaallit Nunaanni Peqqissusermik Ilisimatusarfik
Christian Wennecke, cand.scient.adm., Greenland Business A/S-imi pisortaq
Eva Mätzler, M.Sc., Asiaq immikkoortoqarfiani aqutsisoq, Avataaniit uuttortaanermi immikkoortoqarfik.
Ilaasortat allat ukiuni tulliuttuni pingasuni qinigaaqqittut tassaapput:
Siulittaasoq Josephine Nymand, ph.d., Pinngortitaleriffimmi immikkoortortaqarfimmi aqutsisoq, Avatangiisinut aatsitassanullu immikkoortoqarfik
Thomas Ingemann, ph.d., Institut for Byggeri og Anlæg, Danmarks Tekniske Universitet-imi lektori
Morten Meldgaard, ph.d., dr.phil., Ilisimatusarfimmi aamma GLOBE Instituttet, Københavns Universitetimi professori
Gert Mulvad, ph.d., MD, Doc.hc., DIH nunap immikkoortuani nakorsaq, Kalaallit Nunaanni Peqqissusermik Ilisimatusarfiup ataatsimiititaliaata siulittaasua
Christian Koch Madsen, ph.d., NKA-mi pisortap tullersortaa – Nunatta Katersugaasivia Allagaateqarfialu
Qinigaaffiup sivisussusaa
Ilaasortat ukiut pingasut issiasussanngorlugit piffissami 1. oktober – 31. december 2023 Naalakkersuisunit toqqarneqarput. Ilaasortat tamarmik, ilisimatusarfeqarfinnit, isummanit nutaanit ineriartortitsiveqarfinnit aamma suliffeqarfinnit ilaatigut ilisimatusarnermik ingerlataqartunit Kalaallit Nunaanneersunit innersuunneqarsimanertik tunngavigalugu inuttut piginnaasaat aallaavigalugit toqqarneqartarput.
TUSAGASSIORTUNUT ATTAVEQAAT:
Annerusunik paasissutissat oqaaseqaatilluunniit siulittaasumut, Josephine Nymand på tlf: +299 287703 imaluunniit e-mail jony@natur.gl -imut saaffiginnissutigineqarsinnaapput.
