Lene Kielsen Holm pillugu eqqaaniut (1963-2021)

Saqqummiivoq Januarip 11, 2021

Lene Kielsen Holm-ip kræftimik toquneranik tusarlerneqarneq alianaqaaq.
Lene 10. januar toqukkut qimaguppoq.

Lene inuuvoq immikkuullarissoq ilisimatusartartoq aqqutissiuisorlu. Suliaminut alapernaatsuuvoq, tunniusimalluarluni piumassuseqarluartuullunilu – tunniassassaqarluartoq qiimasorlu, isumassuisoq inuttullu soqutiginartoq. Naapillugu inussiarnertuaannartoq.

Lenep ilisimasami pingaaruteqassusai aallaqqaataaniilli takusinnaavai. Suleqateqartarnermini nunatsinni ilisimasat ilisimatusarnikkullu periaatsit ataatsimoortippai, taamaalillunilu ilisimalikkat qaffasinnerulersillugit. Lenep kalaallit nunaanni najugallit ilisimasaat ilisimasatulli allatut pingaaruteqartillugit aalluttarpai.

Lenep nunatta iluani avataanilu ilisimatusarnerup silarsuaani ataqqineqarnera ullumikkut allaat ungasissumit mailikkut allatullu saaffiginnittorpassuaqarneratigut takusinnaavarput. Ilisimatusartut silarsuaanni ilisimatusartut kikkuugaluarunik suliaminnut Lenep ilisimasaasa pingaaruteqassusai, inuiaqatigiinni kalaaliusunut, ilisimatusarnermi ileqqorissaarnermut, attaveqatigiinnik pilersitsinermut ilisimasallu qanoq ataqatigiinnerinut soqutiginnittut kikkunnulluuniit saamalluni akuutitsillunilu saqqummiussisarnera saaffiginnittunit oqaatigineqarpoq. Pingaartumik sumiikkaluaruniluunniit nuannersumik sunniisarnera oqaluttuarineqarpoq. Ilisimasaminik tunniusserusuttorujussuuvoq, inuppassuarnut siunnersuisuusarluni, inunnillu immikkoortitsinani isumaginnilluartarluni.

Lene Kielsen Holm nunat tamalaat akornanni suliaminut annertuunut nersornaaserneqartarpoq, taakkulu Lenep ilisimatusartarneranut suliaqarusussusaanullu takussutissaapput. Kingullermik 2018-imi Lene suleqatigisanilu suliaminnut ’Siku – Inuit – Hila’ aamma atuakkiaminnut ’The Meaning of Ice’-mut Mohn-prisen, norskinit nersornaatisissutigaat.

Lene kalaallini ilisimatusartut akornanni inuup inuiaqatigiillu pissusaanik ilinniagartuutut pingaaruteqartutut siumut isiginneriaasilittut eqqaamaneqarumaarpoq. Lenemik ilisimannittuusugut inuttut kissalaartutut, qiimasutut tunniussaqarluartutullu kingumut eqqaasassavarput. Lenep siusippallaarujussuarluni qimagunnera Kalaallit Nunaanni ilisimatusarnermut uagutsinnullumi annaasaqaataavoq annertooq.

Lenep ilaqutai misiginneqatigalugillu eqqarsaatitsinniipput.

Lene Kielsen Holmip eqqaaneqarnera ataqqinartuuli.

Josephine Nymand

Nunatsinni Ilisimatusarnermik Siunnersuisoqatigiit

 

Share on facebook
Facebook
Share on linkedin
LinkedIn
Share on email
Email
Scroll to Top