Kalaallit Nunaat aamma Island ilisimatusarnikkut ilinniartitaanikkullu nukittorsaasussamik suleqatigiinnialerput.

4. maj 2022

Nunatsinni Ilisimatusarnermik Siunnersuisoqatigiit islandimiullu ilisimatusarfiat Rannís Memorandum of Understanding (MoU), kalaallit islandermiullu ilisimatusarnikkut suleqatigiilluarnerulernissaanik pilersitsisumik suleqatigiinneq atsiorsimalerpaat.

Suleqatigiinnerup ilaatigut ilisimatusarnikkut ilinniartitaanikkullu siuarsaalluni ataatsimut aningaasaliinissaq aammalu pisunut suliniutinullu aqqutissiueqatigiinnissaq siunertaraa. Taakkualu tassaasinnaapput workshopernerit, attaveqarfissarsioqatigiinnerit, seminarernerit, ilisimatusartunut ilinniartunullu paarlaaqatigiinnerit il.il.

Arctic Circle Assembly 2021-mut atatillugu aaqqissuussaasut marluk ilisimatusartut suliffeqarfiillu kalaaliusut islandermiuusullu akornanni ataatsimiisitseqattaarput ilisimatusarnikkut, nutaaliornikkut ilinniartitaanikkullu suleqatigiissinnaaneq pillugu eqqarteqatigiillutik. Ilisimatusarfeqarfinnit marluusunit taakkunanit attaveqaatit nukittorsarneqarsinnaanerat soqutigineqarluarput, sualummik aalisarnikkut, immami pisuussutit, geopolitikki, suiaassutsinik misissuinerit, piujuartitsinermik saqinneq, pinngortitami navianartut silallu pissusianik ilisimatusarfiit. Ataatsimiinnerni peqataasut nalunaarusiaq ”Greenland and Iceland in the new Arctic” aamma eqqartorpaat Kalaallillu Nunaata Islandillu ukiut kingulliit illuttut suleqatigiinnerisa nukittuallassimasoq eqqartorlugu.

Ilisimatusarfiit suleqataaffiusinnaasut siuarsarniarlugit Kalaallillu Nunaanni Islandimilu ilisimatusarnerit pingaarnersiorlugit oqaloqatigiittarneq ingerlatiinnarniarlugu ataatsimut workshopperneq 25.-26. august 2022 ingerlanneqassaaq Arctic Circle Greenland Forum sioqqullugu ’pre-event’-itut. Workshoppernermi Kalaallit Nunaanni Islandimilu ilisimatusartut, aaqqissuussat suliffeqarfiillu aalisarneq, immap pisuussutai, geopolitikki inuiaqatigiinnullu sammisumut tunngasut katersuutsissavai. Workshopernermittaaq ataatsimut aningaasaliisinnaaneq ersarissisissavaa, attaveqafissarsiorfissaqqissaallunilu. Workshoppernissaq Arctic Hub aamma Icelandic Arctic Cooperation Network peqatigiillutik aaqqissuunneqassaaq.

Nunatsinni Ilisimatusarnermik Siunnersuisoqatigiinni siulittaasoq, Josephine Nymand oqarpoq:

”Islandermiunik suli pitsaanerusumik suleqatigiissinnaanermut periarfissarpassuarnik eqqartueqateqarneq nuannersimaqaa. Tamanit ilisimatusarnikkut pingaarnersiuinermi pingaarnersiuinermut soqutigisaqarnermullu pimoorullugu soqutigineqarluarpoq. Iluatsillugu, ilisimatusarnikkut politikkit aningaasaliinerillu Islandermiut ilisimasaqarfigilluarpaat, Kalaallit Nunaanni ilinniarfigilluarsinnaasatsinnik”.

Rannís-imi pisortaaneq, Àgúst Hjörtur Ingþórsson oqarpoq: 

”Kingullermik Arctic Circle Assembly Reykjavíkimi ingerlanneqarnerani kalaallit ilisimatusartut ilinniarfiillu attaveqarfiginerisa nukittorsarnissaannut pingaarutilimmik isumaqatigiissusiorpugut. Kalaallit Nunaallu suleqatigiinnerup issittumi periusissiatsinni suleqatigiinnitsinnullu pingaaruteqarpoq aammalu aningaasaqarnikkut, ilisimatusarnikkut, nutaaliornikkut ilinniartitaanikkullu periarfissat nunanilu qaniginerpaasarput peqatigalugu piviusunngortinnissaanut qilanaarpugut”.