NIS

Kommissionen for Videnskabelige Undersøgelser i Grønland / KVUG – (Kalaallit Nunaanni Ilisimatusarnermut Siunnersuisoqatigiit) (KVUG) 2012-ip naanerani atorunnaarsinneqarmat ukiualunnguit qaangiummata Nunatsinni Ilisimatusarnermik Siunnersuisoqatigiiliortoqarpoq.

Siunnersuisoqatigiit Allatseqarfiullu tunngaviusumik inatsisaat jannuaarip aallaqqaataani 2014-imi atuutilerpoq novembarip 29-ani 2013-imi aalajangerneqartoq.

Siunnersuisoqatigiit ivertinneqarlutik ataatsimeeqqaarput maajip 29-anni 2014-imi.

Saamimmit: Pinngortitamut, Avatangiiseqarnermut Ilisimatusarnermullu Naalakkersuisoqarfimmi Ilisimatusarnermik Suleqatigiinniit ilisimatusarmermik ataqatigiissaarisut Najaaraq Paniula aamma Sten Lund; Nunatsinni Ilisimatusarnermik Siunnersuisoqatigiinni ilaasortaq Morten Meldgaard, siulittaasup tullia Thomas Ingeman-Nielsen, ilaasortaanikoq Carl Egede Bøggild, ilaasortat Gert Mulvad aamma Daniel Thorleifsen, ilaasortaanikut Inge Høst-Seiding aamma Louise Kolby Christensen siulittaasorlu Josephine Nymand.

 

Nunatsinni Ilisimatusarnermik Siunnersuisoqatigiit ilisimatusarnermik sammisanit ukuninnga tamarmiusunit aallartitaqarfeqarput:

  • Pinngortitalerineq
  • Peqqissusilerineq
  • Inuiaqatigiilerineq
  • Inulerineq (humaniora)
  • Teknologii

Ilaasortat arfineq-pingasuusut ukiut pingasukkaarlugit toqqarneqartartut ukiumut minnerpaamik immikkut ataatsimeersuartarput. Ilisimatusarnermik Siunnersuisoqatigiit namminneerlutik suleriusissamik najoqqutassiortarput.

Naalakkersuisut siunnersuisoqatigiit siulittaasuat ilaasortallu inuttut piginnaasaat toqqammavigalugit toqqartarpaat isumaqarlunilu ilaasortat ataasiakkaat suliaminnut tunngasumik piginnaasaat misilittagaallu aallaavigalugit toqqarneqartartut.

Ilaasortaq kingusinnerusukkut atorfimminik allannguinermini namminerisamik ilaasortaanini attatiinnarsinnaavaa.

Ilaasortap siunnersuisoqataatinneqarnerminit tunuaruni Naalakkersuisut piffissami kingullermi innersuussanit toqqaassapput. Ilaasortanngortinneqartoq siunnersuisuuffimmi ukiut pingasuusut qaangiunnissaata tungaanut siunnersuisoqataatinneqassaaq.

Nunatsinni Ilisimatusarnermik Siunnersuisoqatigiit nuna tamakkerlugu namminersorluni Nunatsinnut iluaqutissanngorlugu kattuffiuvoq, taamaammat siunnersuinermini ingerlanerminilu Naalakkersuisunit ilitsersorneqartussaanani.

Nunatsinni Ilisimatusarnermik Siunnersuisoqatigiit anguniagaraat  ilisimatusarneq nunatsinneersoq siuarsassallugu piginnaanngorsassallugu Nunatsinnut atanerulissasoq inuiaqatigiinnullu iluaqutaanerulissasoq.

Nunatsinni Ilisimatusarnermik Siunnersuisoqatigiit PhD & PostDoc’inut Ilisimatusarnermillu Siuarsaanermik aningaasaliissutinik qinnuteqaatinik naliliisarpoq, Ilisimatusarnermik Siuarsaanermiillu aningaasaliissutinik agguaasarluni.