Allatseqarfik

Allatseqarfiup suliassai

Allatseqarfiup Ilisimatusarnermik Siunnersuisoqatigiit ingerlaneranni ilisimatusarnermi siunnersuinermut aningaasaliinermullu inatsit eqquutsinnissaanut isumannaassavaa, suliamilu ilagaat Nunatsinni ilisimatusarnermi suliniutinik ataqatigiissaarineq pingaarnersiuinerlu, Nunatsinni nunanilu allani ilisimatusarnermi suleqatigiinneq nukittorsarlugu, ilanngullugu Nunatsinni ilisimatusarneq pillugu akunniliulluni paasititsiniaaneq annertusarlugu.

Allatseqarfiup Siunnersuisoqatigiinnik tapersersuinissaq pingaarnertut suliassaraa tamatumanilu ilisimatusarnermi politikkikkut anguniakkat pingaarnerit piviusunngortinniassallugit. Allatseqarfik Siunnersuisoqatigiit iluanni, ilisimatusarnermik suliaqartuni tamanilu attaveqaatitut ingerlassaaq.

Allatseqarfiup namminersortup Naalakkersuisoqarfimmiiffigisaanit Siunnersuisoqatigiit atassuteqarfigisaannit sullinneqarput. Allatseqarfiup suliassai annertussusaalu pillugit Siunnersuisoqatigiit naalakkersuisoqarfiullu isumaqatigiissutaanni nassuiarneqarsimapput.

 

Allatseqarfiup assigiinngitsut suliarai, makku ilaallutik:

  • Missingersuusiorneq aningaasaqarnermullu malitseqartitsineq.
  • Naalakkersuisoqarfiit iluini avammullu tamanut attaveqaqatigiinneq.
  • Siunnersuisoqatigiit ilisimatusarnissamut aningaasanik qinnuteqaqqusinerat aamma tunniussinerat/itigartitsinerat kiisalu nalunaarusiortarnerat, matumani qinnuteqaqqusinermi piumasaqaatinik ersarissunik nassuiaanerit pillugit tamanut attaveqaqaatigisarneri kiisalu ilisimatusartunut tamanullu siunner-suisoqatigiit nalunaaruteqartarnerat.
  • Kalaallit Nunaanni ilisimatusarnernut paasissutissanut kisitsisit atorlugit nassuiaasiorneq.
  • Siunnersuisoqatigiinnut suliaqarnissanut qinnuteqateqaatinut tunngasunik kisitsisit atorlugit nassuiaasiorneq.
  • Kalaallit ilisimatusartut innuttaasullu aamma nunat tamalaat akuuffigisaannik Kalaallit Nunaanni imaluunniit Kalaallit Nunaat pillugu suliniutaat pillugit ataqatigiissaarineq.
  • Politikkikkut inuiaqatigiinniluunniit ineriartornernut tunngasunik Siunnersuisoqatigiinnut misissueqqissaarnerit.

 

Allatseqarfik pillugu

Ilisimatusarnermut Siunnersuisoqatigiit Allatseqarfiat upernaami 2015-imi pilersinneqarpoq Namminersorlutik Oqartussani Pinngortitamut, Avatangiisinut Ilisimatusarnermullu Naalakkersuisoqarfimmi inissinneqarluni.

Nunatsinni Ilisimatusarnermik Siunnersuisoqatigiit allattaat siulleq tassaavoq Sten Jeppson, Ilisimatusarfimmi Inuiaat Piorsarsimassusaasalu Oqaluttuarisaaneranni kandidat’iusoq.
2015-imiit 2016-imut ilisimatusarnermik siunnersuisoqatigiinnut allatsitut atorfeqarpoq.

2016’imi Allatseqarfimmi piffissaq tamakkertarlugu allatsitut sulisartussamik pissarsinissap tungaanut Juaaka Lyberth siunnersortitut atorfinitsinneqarpoq. Københavns Universitet’imi Eskimologi’mi kandidat’itut naammassinikuuvoq.

Arnajaaq Lynge allatsit pingajoraat. Ilinniartitsisutut naammassinikuuvoq, Inuiaat Piorsarsimassusaasalu Oqaluttuarisaaneranni bachelor’iuvoq piffissallu ilaa oktobari 2016-imi allatsitut sulisartussatut sulisorineqalernermini Inuiaqatigiilerinermi inaarutaasumik allaaserinnippoq.

MSSc’tut (Master of Social Science in Social Sciences) West Nordic Studies aqqutigalugu Ilisimatusarfimmi jannuaarimi 2017-imi naammassivoq, naammassisaa cand. soc.’i assigaa, tamatumalu kingorna Ilisimatusarnermik Siunnersuisoqatigiit allattaattut piffissaq tamakkertarlugu sulisartussatut atorfinitsinneqarpoq.

Siunnersuisoqatigiit allatsiat Inuussutissarfiornermut, Nukissiuuteqarnermut Ilisimatusarnermullu Naalakkersuisoqarfimmi allaffeqarpoq. Jess Svane naalakkersuisuuvoq.

 

Nunatsinni Ilisimatusarnermik Siunnersuisoqatigiinni allatsiuvoq MSSc Arnajaaq Lynge.
CV’a uani takuuk.

 

e-mail: arnl@nanoq.gl
tlf. nr.: +299 34 57 61