Nunatsinni Ilisimatusarnermik Siunnersuisoqatigiit suliniutaat

Tamat oqartussaaqataanerannut tunngaviulluinnarpoq ilisimasanik ajornaquteqanngitsumik pissarsisinnaaneq, ilisimasallu ilisimatusarnikkut naqissuserneqartarnerannut tunngaviusut tamanit ilisimaneqarnissaat.

Politikkikkut aalajangiinerit ilisimatusarnermit pisanngillat, tamalli oqartussaaqataanerannit aalajangiinerit ilisimasanik tamanit takuneqarsinnaasunit uppernarsaasersukkanillu tunngaveqartarlutik.

Ilisimatusarnermut politikki inuiaqatigiinnut politikkiuvoq. Kalaallit atugarissaarnerisa qaffasissusaat attatiinnarneqassappat inuussutissarsiutinik, inuiaqatigiinni isumassuinermik suliffeqarfinnik piorsarsimassutsikkullu aallunneqarnerannik tunngaveqassaaq, taakkulu tamarmik assigiinngitsumik ilisimatusarfigineqarnerannik nutaaliorfigineqarnerannillu tunngaveqassalluni.

Pitsaanerusumik atugarissaarnermik, politikkikkut namminiileriartuaarneruneq Kalaallillu Nunaata aningaasaqarnikkut imminut napatilernissaanut ilisimatusarnerit aaqqissuulluakkat qaffasissullu pisariaqaleraluttuinnarsisippaat.

Siunnersuisoqatigiit nalilerpaat ukiumut marlunnik kisitsitalinnik millioninik pisariaqartitsisoqartoq Kalaallit Nunaanni inuiaqatigiit pitsaasumik ineriartornissaannut qulak-keerinnittumik tamanit ilisimatusarneq pituttugaanngitsoq Siunnersuisoqatigiit tamakkiisumik ikorfartorsinnaassappassuk.