Ilisimatusarnermik Siuarsaaneq

Ilisimatusarnermik Siuarsaaneq

Nunatsinni ilisimatusarnermi tamani iluarsartuussamik pilersaarusiani  aallartisaaniarnermi Ilisimatusarnermik Siuarsaanermi tapiissutinik qinnuteqartoqarsinnaavoq. 1997-imiilli ukiumut marloriarluni agguaassisoqartarpoq. Tapiissutit ukiumut katillugit 900.000 koruuniupput Namminersorlutik Oqartussanit aningaasalersorneqartumik.

 

Ilisimatusarnermut siunnersuisarneq ilisimatusarnermullu aningaasaliisarneq pillugit Inatsisartut inatsisaat nr. 5, 29. november 2013-imeersoq najoqqutaralugu, Kapitali 2: Nunatsinni Ilisimatusarnermik Siunnersuisoqatigiit (Grønlands Forskningsråd, Greenland Research Council) – pilersinneqarnerat suliassaallu, § 6. Siunnersuisoqatigiit suliassanik suliaqarnerminni suliassaraat:

4)  Aningaasat ilisimatusarnermut atugassanut qinnuteqaatit nalilersorlugillu tulleriiaarnissaat.

5)  Namminersorlutik Oqartussat susassaqarfii akimorlugit aningaasanik ilisimatusarnermut atorneqartussanik tunniussinermi ataqatigiissaarinissaq tulleriiaarinissarlu.

6)  Ilisimatusarnermut aningaasaliissutaasut tamarmik suliffeqarfinnut aalajangersimasunut attuumassuteqarlutik pisortanit aallaavittut aningaasaliissutaanngitsut imaluunniit aningaasaliissutit ilisimatusarneq aallaavigalugu oqartussaasunit isumagineqartut ilisimatusarnikkut suliatigut pitsaassutsimikkut naliliiffigereerlugit ammasumik unammillerneq aqqutigalugu tunniunneqartarnissaat qulakkeerneqassasoq, aningaasallu tunngavissat kikkunnut tamanut saqqummiunneqartut tunngavigalugit qinnuteqaammik tunniussereernikkut tunniunneqartassasut.

7)  Ilisimatusarneq pillugu paasissutissiisarnerup ilisimatusarnerlu pillugu ingerlatitseqqiisarnerup siuarsarnissaa nukittorsarnissaalu.

8)  Kalaallit Nunaanni ilisimatusarnikkut suliniuteqarnerup malinnaaffiginissaanut nalilersornissaanullu aallartitsinissaq, tassanittaaq ilisimatusarnikkut ilinniarnerit ilisimatusarnikkullu suliaqartut ilanngullugit.

9)  Suliassanik ilisimatusarnermut attuumassuteqartunik Siunnersuisoqatigiinnut Naalakkersuisunit piumasarineqartunut suliaqartarnissaq.