Ilisimatusarnermik Siuarsaaneq (IS)

Ilisimatusarnermik iluarsartuussamik pilersaarusiaqaruit Nunatsinnilu ilisimatusarnermik suliffeqarfimmut atassuteqaruit Ilisimatusarnermik Siuarsaanermik aningaasaliissutinik qinnuteqarsinnaavutit.

Qinnuteqaammi immersugassami ilisimatusarnermik iluarsartuullugu pilersaarusiat pillugu allaaserinniffissaqarpoq, matumuuna piumasaqaatit naammassisassat tassaniillutik.

Agguaassinermi aningaasaliissutit katillugit 100.000,00 koruunit, tassa piffimmi tassani aningaasaliissutit katillugit tallimararterutaat, iluarsartuullugu pilersaarusianut ataasiakkaanut tunniussassatut tunngavigineqartarpoq. Overhead’inut tapiisoqarneq ajorpoq. Aammattaaq ataatsimiinnerni peqataanernut angalanernullu tapiisoqarneq ajorpoq.

Ilisimatusarnermik iluarsartuullugu pilersaarusiami nutserinerit, naqitanik saqqummiinerit assigisaanillu suliami ilaappata tapiisoqarsinnaavoq. Ilisimatusarnermi inernerit saqqummiussinerit/nutserinerit kisiisa tapiiffigineqarnissaannut qinnuteqaatigineqarsinnaanngillat.

 

Sulissineq

Kingusinnerpaamik qinnuteqarnermik tunniussivissap kingorna sap. ak. arfineq-pingasut sullinneqarnissat naatsorsuutigissavat.

Qinnuteqartut tamarmik allakkatigut akuerineqarsimanerlutik itigartinneqarsimanerlutilluunniit nalunaarfigineqassapput.

Ilitsersuut

Qinnuteqaat una immersorneqassaaq.
Qinnuteqaatip annertus­susaa 5 MB-iussaaq elektro­niskimillu pdf-fiilimut ataatsimut uunga nassiullugit:

Nunatsinni Ilisimatusarnermik Siunnersuisoqatigiit
e-mail: nis@nanoq.gl

Killigititaq

Qinnuteqarfissatut killigitinneqartarpoq ulluinnaq siulleq martsimi oktobarimilu, ullup qeqqanut.

 

 

 

Aningaasaliissutinik tigusisup akisussaaffigaa aningaasaliissutit atuuffissatut siunniussamut atorneqarnissaat.

Ukiumoortumik nalunaarusiummik naatsorsuutinillu martsip aallaqqaataa tikitsinnagu Nunatsinni Ilisimatusarnermik Siunnersuisoqatigiinnut ukiut tamaasa nassiussisoqartassooq, takussutissiisumik ukiup ingerlanerani kingullermi aningaasaliissutit sumut atorneqarsimaneranik.
Immersugassaq uani (danskisut) ammarneqarsinnaavoq.

Ilisimatusarnermik iluarsartuullugu pilersaarusiami inernerit suliap naammassereernerata kingorna qaammatit sisamat qaangiutsinnagit aningaasat tapiutigineqarsimasut missingersuutaannik, annerpaamik 400-nik oqaasertalimmik paasiuminartunillu assilialersuutitalimmik nalunaarusiamik Nunatsinni inuiaqatigiinnut paasissutissiissutaasinnaasunngorlugu Nunatsinni Ilisimatusarnermik Siunnersuisoqatigiinnut tunniussisoqassooq.

Ilisimatusarnermik iluarsartuullugu pilersaarusiamit inernerit aningaasaliissutinik tigusisup pisussaaffigaa pisortatigoortumik saqqummiussissalluni.

Ilisimatusarnermik iluarsartuullugu pilersaarusiamit inernerit aningaasaliissutinik pisortatigoortumik saqqummiussinermini paasissutissiissutigissavaa Nunatsinni Ilisimatusarnermik Siunnersuisoqatigiinnit aningaasanik taperneqarsimalluni.

ilisimatusarnermik iluarsartuullugu pilersaarusiamit inernernik saqqummiussat tamarmik Nunatsinni Ilisimatusarnermik Siunnersuisoqatigiinnut inaarutaasumik nalunaarusiami uppernarsarneqassapput. Saqqummiussat nittartakkami Ilisimatusarnermik Siarsaanermik Nalunaarsorfiani allattugaatigineqartassapput.